NiNeu bideocurriculum lehiaketaren hirugarren edizioa, martxan

Lana bilatzerako orduan curriculuma izan ohi da gure aurkezpen karta eta, garrantzitsuena, noski, jasotzen duen edukia izan arren, aurkezteko moduak ere informazio asko ematen du. Paperezko formatuan egindako curriculuma bideocurriculumaz laguntzea da aurkezpena erakargarriago egiteko moduetako bat eta, aukera hori sustatzeko, NiNeu bideocurriculum lehiaketa jarri du martxan Debagoieneko Mankomunitateko Garapen Agentziak.

Ikasketak, lan esperientzia... paperezko curriculumak jasotzen duen edukia jasotzen du, funtsean, bideocurriculumak, baina beste modu batean aurkeztuta. Horregatik, lan bila dabilen pertsonaren beste ezaugarri edo gaitasun batzuez jabetzeko ere lagungarri izaten da hartzailearentzako. 

Pixkanaka, indarra hartzen ari den euskarria da bideoa –paperezko formatuan egindako curriculumaren osagarri moduan–, baina lanketa bat eskatzen du eta, oraingoz behintzat, ez da hedatu hasieran pentsa zitekeena bezain beste. Bada, horri bultzada bat ematen laguntzeko, Debagoieneko Mankomunitateko Garapen Agentziatik NiNeu izeneko bideocurriculum lehiaketa abiarazi dute, hirugarren aldiz. Aurreko edizioetan 20 bat lan aurkeztu dituzte, bataz beste, eta kopuru hori gainditzea espero dute oraingoan. Izan ere, ikastetxeekin izandako harremanei esker, ikasgelan bertan landu dute askok gaia.

Lau aspektu

Bi kategoria izango ditu lehiaketak, ikasleena bat eta langile edo langabeena bestea; eta 16 urte baino gehiago izatea da parte hartu ahal izateko baldintza bakarra. Epaimahaiak lau aspektu baloratuko ditu: sormena eta originaltasuna, edukia, IKTen erabilera eta komunikatzeko gaitasuna.

Otsailaren 22ra arte aurkeztu daitezke lanak. Sariak, berriz, GOIAZ! Lanbide Heziketa azokan banatuko dituzte. Martxoaren 15ean eta 16an egingo da aurten, Kulturaten. Parte hartzera animatzeko deia egin dute antolatzaileek.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.