Ludoteka eta gaztelekuak prest ikasturte berrirako

Eskualdeko Gazteria teknikariek aurkezpen bateratua egin dute, ikasturte berrian izango diren zerbitzuen berri emateko. Irailean zehar irekiko dituzte haurrentzako ludotekak eta nerabeentzako gaztelekuak, eta horien gaineko xehetasunak eman dituzte. Gaztematika izeneko dinamikaren barruan daude guztiak eta helburu berdinekin egiten dute lan; hori bai, tokian tokiko berezitasunak aintzat hartuta.

Debagoieneko herri ia guztietan (Arrasate, Bergara, Oñati, Aretxabaleta, Eskoriatza eta Elgeta) eskaintzen dituzte udalek haur eta nerabeentzako zerbitzuak, familia eta eskola inguruak ematen dizkien aukerez gain beste hezkuntza aukera batzuk ere eskura ipintzeko eta ezberdintasun sozialek euren bizitzetan duten eragina arintzeko helburuekin, besteak beste. Eta ezaugarri bat dute: irisgarritasuna. Arreta berezia jartzen dute haurren eta nerabeen arteko euskararen erabileran eta zerbitzu euskaldunak izatean, eta aisialdi hezitzailea lantzen dute.

Haurrentzako, ludotekak; nerabeentzako, gaztelekuak

Haurrentzako ludotekak astelehenetik ostiralera egoten dira martxan, arratsaldetan; batzuk martxan daude eta datorren asterako halaxe egongo dira guztiak. Urtean zehar edozein momentutan egin daiteke proba eta, gustatuz gero, izena eman; prezioa sinbolikoa da. Nerabeei zuzendutako gaztelekuak, berriz, martxan daude guztiak; asteburuetan egoten dira zabalik kasu gehienetan, eta astean zehar ere irekita dauden tokietan, eskola orduetatik kanpo. Gabonetan, Aste Santuan eta udan, gainera, zerbitzu berezia eskaintzen dute, gaztetxoek eskolan oporrak dituztela kontuan izanik. Gaztelekuen kasuan, ez dago izena eman beharrik.

Ekintza konpartituak

Gazteria teknikariek adierazitakoaren arabera, erabiltzaile kopuruak ematea ez da erraza: herriaren tamainak zerikusi zuzena du horretan, eta urtetik urtera aldatzen joaten dira, gainera. Arrasaten 400 inguru dira, adibidez; Aretxabaletako eta Eskoriatzako kasuan, 50 eta 80 bitartean; eta Bergaran kopurua igotzea espero dute, Agorrosindik erdigunera joan direla kontuan izanik.

Familiei zuzendutako gune libreak ere badaude, hezitzailerik gabe eta gurasoen ardurapean. Aurrera begira, asmoa da baita ere ekintza konpartituak egitea, herri ezberdinetako gazteek elkar ezagutzeko.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.