Espainiako Gobernuak EAEn duen ordezkari Carlos Urkixok "euskararen normalizazioa geldiarazteko abiatutako erasoaldia" salatu du Kontseiluak. Horri aurre egiteko, elkarretaratzeak deitu ditu. "Estatu espainiarreko ordezkariak Gipuzkoako Foru Aldundiaren eta beste 46 udalen aurka egin du azken hilabeteotan, hizkuntza-politikari lotutako hainbat arlotan. Lehenik, Gipuzkoako Foru Aldundiaren aurka egin zuen, 2009an hartutako erabakia (kontratazioetan hizkuntza irizpideak jartzea) betetzen hasi zelako. Ondoren, Udaletik programaren baitan, udalen aurka egin zuen. Hainbat udali, tartean Eskoriatzakoari, indarrean dituzten euskara planak bidaltzeko eskatu die. Azkenik, hizkuntza-irizpideekin lotutako edozein erabaki jakinarazteko agindua eman die hainbat udalei", adierazi du Kontseiluko idazkari nagusi Paul Bilbaok. Eta ondorengoa gehitu du: "Estatu frantsesak ikastolen aurka egin du, 1850eko Falloux legea baliatuta".
Hala, herritarrei dei egin diete, gaur, eguaztena, euskararen normalizazioa helburu duten neurriak babesteko eta estatuen esku-hartzea salatzeko. Agerraldiak gaur egingo dituzte, herriko plazetan:
- Bergaran, 18:30ean.
- Oñatin, 19:00etan.
- Aretxabaletan, 19:00etan.
- Arrasate, 19:30ean.
