Bergarako Ariznoa elkarteak antolatuta jokatu zen zapatuan Gipuzkoako txapelketako lehen fasea. Bergarako gimnastak eta Arrasateko Dragoi taldekoak ibili ziren eta, horiez gain, Donostia, Azkoitia, Eibar, Hernani, Tolosa, Zarautz eta beste herri batzuetako taldeko gimnastak etorri ziren.
Zapatuko txapelketaren berezitasuna da puntuatzeko sistema berria lehenengo aldiz erabiltzen zela. Horrez gain, aurtengo lehenengo txapelketa izanda, gimnastendako, batik bat, urteko egutegia hasteko eta norbera nola dabilen ikusteko modua izaten da, Ariznoa taldeko Lore Alberdik dioskunez.
Bada, bailarako gimnasta guztiak sailkatu dira eta bi klubak "oso pozik" daude. "Hasteko modurik onena izan da", esaten du Dragoi taldeak.
Goizean, infantil, alebin eta kadeteek egin zituzten euren erakustaldiak, eta batez ere hor egon zen ikusle gehien. Arratsaldean, jubenilen eta seniorren txanda izan zen; lehenengo, taldekako saioak egin zituzten, eta gero, banakakoak.
Bergaratik, infantil, alebin eta jubenil B kategorietako taldeek jardun zuten, eta bakarka, Irati Gardokik (Infantila), Irene Azkargortak (Infantila), Arianna Burgosek (Kadete B) eta Marianna Nunesek (Kadete A).
Arrasatetik, Ane Fernandezek (Kadete B) eta Maialen Gallardok (Kadete B) jardun zuten goizean, eta, bakarka, arratsaldean, Eider Altubek (Jubenil B), Olatz Fernandezek (Senior B) eta Ainhoa Delgadok (Senior B).
Momentu batzuetan urduritasuna nagusitu zen arren, bailarako gimnastek une horiek gainditzea eta epaileen aldetik puntuazio onak eskuratzea lortu zuten.
Datorren zapatuan, Arrasateko Uarkape pilotalekuan, Gipuzkoako benjaminen topaketa izango da.
%2008.42.48_tokikom_735x413.jpg)
