Sinatze ekitaldiaren ostean, araztegiko instalazioak ezagutu dituzte. Goian aipatutakoez gain, bertan izan dira Carlos Urquijo Espainiako Gobernuaren ordezkaria, Josean Galera, Eusko Jaurlaritzako Ingurumen Sailburuordea, eta Debagoienetik, Arrasateko alkate Inazio Azkagarraurizar, besteak beste.
Azkarragaurizarrek esan du, ingurumenaren aldeko apustu hau hasia dela dagoeneko emaitzak ematen: "Deba ibaiaren kutsadura maila jaistea lortu dugu eta, batez ere, bertako bizitza berreskuratzea lortzen ari gara". Dio, Arrasaten, aireko eta erreketako kutsadura murrizteko aurrerpausu handiak eman direla eta orain, lurzoruko kutsaduraren txanda dela: "Orain, lurzoruko kutsadura murrizteko pauso sendoak ematea dagokigu, eta lehen bezalaxe, bakoitzak bere alorretik erantzukizunez jokatzea".
Epeleko araztegiak, bestetik, duela urte bete ingurutik dihardu ehuneko ehunean lanean. Aretxabaletatik, Eskoriatzatik eta Arrasatetik datozen ur zikinak jasotzen ditu lehen kolektore batek, eta bigarrenak, ponpatze sistema baten bitartez, Oñatiko urak jasotzen ditu. Araztegian, ur horiek garbitzen dira gero berriz ere ibaira isuri aurretik. Urtean, 2.500 tonelada solido eta materia organiko hartuko ditu araztegiak.