Lehengoan, aizkolariek hainbat proba gainditu beharko dituzte: abiadura-proba, zutikakoa, esku bakarrarekin, kolpeka eta aitzurra; Hodei Ezpeleta, Mikel Agirre, Xabier Zaldua eta Ernesto Ezpeleta Bihurri ariko dira lan horretan. Harri-jasotzen Ainhize Zumeta ariko da, eta Ainhoa Larrinoak, berriz, txingak eramango ditu. Haiekin batera, eta erakustaldiaren lehen zatia amaitzeko, Iparraldeko jokoak ikusi ahalko dira, Karlos Aretxabaletaren eskutik: lasto-altxatzea, lasto-botatzea eta ingude-jasotze erronka: Larrinoa, Aretxabaletaren aurka.
Bigarren atalerako, bi hirukoteren arteko erronka antolatu dute: aizkoran, txinga-eramaten, trontzan eta korrikan ariko dira. Azkenik, hirugarren atala, motozerra-proba izango da.
"Askotariko" probak
Bihurrik azaldu duenez, "askotariko" probak prestatzen saiatzen dira, eta nobedadeak ere bai. "Bergaran urtero jende pila egoten da gu ikusten, probak estuak eta politak izaten dira, eta horrek ere erakartzen du jendea", esan du Bihurrik.