Elkarretaratzearen deitzaileek eskerrak eman gura izan dizkiote ganadutegiari "urte askoan herririk herri ibili izan direlako jai herrikoiak sustatzen". Eta orain, "kolpe gogor honen aurrean" haien alboan egon gura dute: "Denbora luzean mimoz eta pasioz egindako lana arriskuan ikustea ez da erraza, ez justua. Baina jakin ez zaudetela bakarrik. Herria, lagunak eta zezenzaleak zuekin gaude".
Ilusioa eta giroa sortu izan dituztela jai askotan gaineratu dute: "Herri honek bere barruan dauka eta hori ez da inoiz galduko". Horregatik hain zuzen itzuleraren zain egongo direla adierazi diete: "Badakigu mina handia dela, baina baita ez duzuela amore emango. Hau ez da agur bat, laster arte bat baizik. Bueltatuko zarete, eta zuekin batera beste guztiok, inoiz baino indartsuago".
Bergarako Zezenak ganadutegiko ugazaba Iñigo Almortza bertan egon da. Hunkituta, eskerrak eman dizkie elkartutako guztiei.
Abelburu guztiak hil beharra
Bergarako Zezenak ganadutegiak domekan jakinarazi zuen abelburu guztiak, 90 buru, sakrifikatu egin beharko zituela, tuberkulosi kasu bat atzeman zutelako. Almortzak adierazi zuen Europako araudia oso zorrotza zela eta ez dela bidezkoa, ez justua, ez zuzena. Era berean, azpimarratu zuen "genetika ez dela sekula errekuperatuko".
