Arrizuriaga jauregian lekua izango duen Kulturgunearen lehen zertzeladak eman ditu Bergarako Udalak, barne-mailan, kultura-eragile, elkarte eta herritarrekin, eta datozen hilabeteetan ateratako ondorioak mahai gainean jarriko ditu, Artaziak kooperatibaren laguntzarekin batera "espazio-kultural ireki, malgu eta parte-hartzailea eraikitzeko". Artaziak kooperatibak gidatuko ditu lau saio abendura bitartean, baina, aurretik, hilaren 9an, 18:00etan, Arrizuriaga jauregian, "ongietorria egiteko" saio bat egingo dute, Artaziak kooperatibako kide Andrea Arrizabalagak asteleheneko prentsaurrekoan esan zuenez. Hausnarketa horretan parte hartu nahi dutenek izena eman beharko dute, apirilaren 7rako, galdetegia beteta.
Lau saioetatik bi uda aurretik izango dira, eta beste biak uda ostean –azkena, abenduan–, eta, besteak beste, Arrizuriaga zerekin lotzen duten, kulturgunearen gobernantza-eredua landu edota ekintza eta lan-ildo zehatzak planteatuko dituzte.
Aurrelanketa, herritarren eskura
Azken urteetan Bergarako Udalak eragileekin egindako batzarretan Arrizuriagak Bergarari emango dizkion balioez eta onurez hausnartu dutela azaldu zuen Bergarako Udaleko Kultura zinegotzi Maite Usabiagak, eta nabarmendu zuen datozen egunetan martxan jarriko duten prozesuan herritarrekin eta kultura-elkarte eta eragileekin pentsatu duten guztia kontrastatuko dutela falta diren erabakiak guztiek batera hartu ditzaten. Arrizuriagan sortu nahi den Kulturgunerako prozesu herritarraren helburua da komunitatearen beharretara egokitzea, eta denborarekin alda daitekeen gunea garatzea; ez da asmoa espazio itxi bat sortzea.
Aurrelanketan ateratako ondorioez galdetuta, azpimarratu zuen Arrizuriaga "topagune handi" bezala irudikatzen dutela, "kultura egonezina" duten herritar, elkarte eta eragileak elkartzeko, kulturari buruz eta aurrera eraman nahi dituzten kultura-politikak eztabaidatu eta erabakitzeko. Irudikatzen dute "askotariko erabilerak" jasoko dituen eraikina izango dela: "Ikusten dugu elkarteen eguneroko jarduna aberastu dezakeen baliabide bat bezala. Hitzaldiak, jardunaldiak, artistak gonbidatzeko gune bat, entsegu-lokalak. Baina, beste alde batetik, badaude herritarrak proiektuka lan egiten dutenak, eta uste dugu haiei ere bide bat zabaldu behar diegula, euren lanak babesteko".
Herritarren parte-hartzea
Artaziak kooperatibako kideak azaldu zuen kulturarekin edozein lotura duten pertsonei zuzendutako saioak izango direla: "Deialdia guztiz irekita dago eta edonork hartu dezake parte; kulturarekin nolabaiteko lotura profesional bat duenak, edo hartzaile bezala ere bai".
Usabiagak nabarmendu zuen Bergarak baduela historian zehar jatorri kultural-artistiko garrantzitsua, eta "hori guztia babestu eta aurrera jarraitzeko beste pauso garrantzitsu bat" gisa definitu zuen Kulturgunea: "Gu ilusio handiz ari gara lanketa egiten, eta iritsi da momentua herrira zabaldu eta konpartitzeko. Eta espero dugu haiek ere horrela hartu ahal izatea".
Hastear da lanen bigarren fasea
Aurreikuspena da Arrizuriaga Kulturgunea martxan izatea 2026ko lehen hiruhilekoan. Arrizuriagan kokatuko dira Kulturgunea eta Emakumeen Txokoa. Kulturguneak hiru solairu izango ditu: beheko eta lehenengo solairua eta sotoa. Bigarren solairuan egongo da Emakumeen Txokoa. Dagoeneko, beheko solairuan eta sotoan berritzeko lanak hasita daude, eta datozen hilabeteetan esleituko dituzte goiko bi solairuetako eta ganbarako obrak. Ondoren, hornitu egin beharko dituzte.
Maite Usabiagak gaineratu du beheko solairuak bi espazio "handi eta garbi" dituela. Sotoan biltegia ere kokatuko da: "Sotoko gelak, nolabait, erdi lurperatuta geratzen dira eta iluntasuna eta isiltasuna bermatu ditzaketen espazioak dira. Momentuz espazio zabala da, ahalik eta zabalena, printzipioz, erabilera anitz izateko".
