Egun berezia izan ohi da Erramu-zapatua bergararrendako, eta aurten jai giroan ibiltzeko aukera izango dute hilaren 12an, orduan ospatuko baita Erramu-zapatua. Dena den, festa usaina lehenago iritsiko da, izan ere, beste urteetan bezala, bezperarako, hilaren 11rako, bertso-saioa antolatu dute, 22:00etan, Seminarixoan. Oihana Iguaran, Beñat Gaztelumendi, Nerea Ibarzabal, Jon Maia eta Onintza Enbeita bertsolariak igoko dira taula gainera. Ibon Leibar Txinbo izango da gai-jartzailea. Sarrerak dagoeneko salgai daude zortzi eurotan.
Hurrengo egunean, Erramu-zapatu egunean, 09:00etatik aurrera egongo da feriaz gozatzeko eguna. Abelburuen erakusketa izango da ikusgai Ibargarain eta elikagai eta artisautza postuak Ibargarain, Simon Arrieta eta San Martin plazan. Makinariaren, landareen eta txorimaloen erakusketa ere jarriko dute, eta Eusko Label pintxoak taloak dastatzeko aukera ere egongo da.
Erramu-zapatuko egitaraua
Egun osoan zehar egongo da zertaz gozatu eta honakoa da Udalak prestatu duen egitaraua:
Apirilak 11, egubakoitza
- 22:00 Bertso-saioa Seminarixoan. Bertsolariak: Oihana Iguaran, Beñat Gaztelumendi, Nerea Ibarzabal, Jon Maia eta Onintza Enbeita.
Apirilak 12, zapatua
- 09:00 Feria irekitzea.
- 10:30 Sukaldaritza zuzenean Elikaenearen eskutik, San Martin plazan.
- 11:00 Kalejira Bergarako Musika Eskolako trikitilariekin.
- 11:00 Sendabelarrekin botikina egiteko tailerra, xarabea, eztularen eta hotzeriaren sintomak aritzeko Ekoudalatxen eskutik, San Martin plazan.
- 12:00 Aurtitzko joaldunak bergarako kaleetan.
- 12:00-12:30 Erleen bizitzari buruzko azalpenak Erlantz Olabarriaren eskutik San Martin plazan. Goizean zehar, kandela tailerra eta panel didaktikoak.
- 12:30 Euskal dantzen emanaldia Bergarako Musika Eskolako dantzari eta fanfarrearekin Munibe plazan. Euriarekin, Seminarixoan.
- 15:00 Herri bazkaria Udal Pilotalekuan. Ondoren, kale animazioa erramu Txarangarekin.
- 17:30 Zezentxoak, Seminarioko patioan.
- 19:00 Dantzaldi-erromeria ibiltaria Aiko taldearekin. Euriarekin, Munibe plazan.