Zientzia, Teknologia eta Berrikuntza jardunaldien baitan kokatzen den erakusketa da BlackBox_, eta otsailaren erdialdera bitartean egongo da hura bisitatzeko aukera Laboratorium Museoan. Aurkezpenean hitza hartu dute Bergarako alkate Gorka Artolak, Laboratorium Museoko zuzendari Rosa Errazkinek, Mugikortasuneko, Turismoko eta Lurralde Antolaketako diputatu Azahara Dominguezek, Eusko Jaurlaritzako Kultura Ondarearen Zuzendari Urkiri Salaberriak eta Indissoluble enpresako zuzendari Juan Roberto Vasquezek. Bestalde, bideodei bitartez parte hartu dute prentsaurrekoan BlackBox_ proiektuaren asmatzaileek: Javier Tejada fisikari eta zientzialariak, eta Norbert Bilbeny etika katedradunak.
Salaberria, Artola eta Dominguez, Vasquezekin batera, 'BlackBox_' erabiltzen. Argazkia: Bergarako Udala.
1.0 bertsioa
Tejada eta Bilbenyk asmatutako proiektua da BlackBox_, baina Indissoluble enpresa arduratu da hura elikatzeaz. Gaur aurkeztutakoa 1.0 bertsioa da, eta enpresako zuzendari Juan Roberto Vasquezek dioenez, "lau interakzio-aurpegi dituen kutxa bat" aurkeztu dute, non erabiltzeko momentuan "IArekin elkarrizketak edota bizitzako garai ezberdinetako argazkien interpretazioak egiten dituen garaian bertan integratzeko. Gainera, ibilbide interaktiboak ditugu, non bakoitzaren erabakien arabera bide batetik edo bestetik eramaten zaituen. Asmoa da elkarrizketa eta eztabaida sortzea bizitzeko modua aldatuko digun horri buruz (adimen artifizialari buruz)".
Vasquezek dio aukeztutakoa lehenengo bertsioa dela, baina aurrerantzean beste toki batzuetan aurkezteko asmoa ere badutela. Era berean, aitortzen du aurkezpena Laboratoriumean egitea "berezia" dela, "zientzia arloari dagokionez, Gipuzkoan garrantzia handia duen tokia delako".
Galdera berriak sortzen
Laboratoriumen "aintzindariak" izaten saiatzen direla aitortu du Artolak, eta hortaz, "gaurkotasuneko eztabaida bat herritarren artean zabaltzeko aukera" aprobetxatu gura izan dute. Adimen artifizialak gizartearen etengabeko eraldaketa eragiteaz gain, "sakonera handiko erronka etiko eta moralak" planteatzen dituela aitortu du Artolak, eta horiek mahai gainean jartzea ere izan da euren helburuetako bat.
"Laboratoriuma gizarte museo bat denez, gizartean pil-pilean dauden gaiak ezagutzera ematea" da museoaren helburua Errazkinen arabera. Momentu honetan, adimen artifizialaren gaia da pil-pilean dagoen horietako bat, eta "sortu ditzakeen beldurrak ekiditeko eta galderak erantzuteko" gizarteratzen dute gaia.
Dominguezek, bere aldetik, nabarmendu du "Debagoienako eskualdeak, eta Bergarak bereziki, duen izen propioa munduko panorama zientifikoan". Gainera, aitortu du Bergara "iraganaren eta etorkizunaren arteko topagunea" dela, eta Laboratoriumak aukera ematen duela "bertatik igaro diren pentsalari eta sortzaile handien ondarea ezagutzeko eta haien ekarpenek gure gizartean nola eragin duten ikusteko".
