Oxirondo azokan elkartu ziren 18:30ean eta Bergarako zinegotzi Ainhoa Leteren zein Ereindajan kooperatibako kide Aitziber Plazaolaren eta Ainhoa Narbaizaren eskutik jaso dute informazioa.
Elikadura burujabetza helburu duen Elikaenea topaguneak irailaren 6an zabaldu zituen ateak, eta proiektuaren sorrera, garapena eta irekiera zelan gauzatu diren lehen eskutik ezagutzeko aukera izan dute koalizioko bailarako kideek. Horrekin batera, aurrera begirako asmoen eta erronken gaineko informazioa ere jaso dute. Bailarako hainbat herritako ordezkariak elkartu ziren, eta haien artean Rebeka Ubera legebiltzarkide elgetarra.
Etorriko dira bisita gehiago
Debagoiena Geuretik Loratzen dinamikaren asmoa da hiru hilabetean behin irteera edo hitzaldi bat antolatzea proiektu eraldatzaile baten inguruan, bailara mailan. "Helburua da eskualdeko sinergiak eta indarrak aprobetxatu eta ondoko herriak zertan ari diren gertutik ezagutzea". Lehen bisita otsailean izan zen. Oñatiko urjauzietara egin zuten irteera, Onaro proiektua eta energia burujabetzan egindako bidea ezagutzeko.
