Bilera horretan egon ziren, besteak beste, Jaurlaritzako Hizkuntza Politikarako sailburuorde Miren Dobaran, Jaurlaritzako Hizkuntza Ikerketa eta Koordinazio zuzendari Josune Zabala eta Gipuzkoako Foru Aldundiko ekonomia sustapenerako zuzendari Unai Andueza.
Bergarako alkate Gorka Artolaren arabera "pozgarria" da Bergaran duela urtebete martxan jarri zen proiektu hori "erreferentziatzat" hartu izana: "Bergaran egitasmo honen baitan 37 enpresa eta eragile biltzea lortu dugu, eta espero dugu eskualdean ere zabaltzen denean atxikimenduak areagotzea. Euskara enpresa sektorean sustatzea izango da aurrerantzean ere gure helburua. Lan handia daukagu oraindik, eta elkarlana beharrezkoa izango da konpromisoak betetzeko. Bailara mailako plan indartsu bat abian jartzea Bergararako ere oso lagungarri izango litzateke".
Bergarako Udalak eta enpresek iazko urrian sinatu zuten hitzarmena, eta horren bitartez hainbat konpromiso hartu zituzten euren gain. Besteak beste, enpresa bakoitzean euskararen egoeraren inguruko diagnostikoa egitea, urteko egitasmo ezberdinak zehaztea edota hitzarmena sinatu duten enpresen artean euskara lehenestea dira konpromiso horietako batzuk.
