Malgutasunetik, ohiko ereduak hausten dituen unibertsitate publikoa

Jon Irizar Aranguren 2022ko eka. 21a, 17:02
Bergarako egoitzan egiten dituzte saio presentzialak irakaskuntza-ereduak hala eskatzen duenean. (Argazkia: UNED Bergara)

Barrenkalean gora, atari eta etxehormen arteko estuasunetik argigunera igarotzen dira herritarrak San Martin Agirre plazara iristean. Ezkerretara, banketxearen aterpetik atzeman liteke plazari entitatea ematen dion lehen eraikina: Bergarako udaletxea. Joan-etorrien eraginez zurigune gutxi dituen zebra-bidera iristean, eskumatara, ageri da bigarren eraikin esanguratsua.

Hamaika dira urteetan izan dituen erabilerak. Egun, baina, hezkuntzaren alorrean estuasunetik argigunera eramateko bidea eskaintzen duen erakunde batek du bertan egoitza: UNEDek.

Malgutasuna

Mende erdira bidean da unibertsitate publikoaren bailarako jarduna. "Tokiko eragileei esker, haien eraginez, eta haien eskutik", hezkuntza zentroko arduradunen hitzetan. Izan ere, Bergarako Udalak, Gipuzkoako Foru Aldundiak, Kutxa Fundazioak eta Eusko Jaurlaritzak babesten dute herri, eskualde, Espainia zein nazioarte mailan eragiten diharduen erakundea.

Sorreratik, malgutasuna da UNEDen nortasun eta bide-orri nagusia. Jakintza-arlo zabalean goi-mailako irakaskuntza eskaintzen dute; humanitate zein zientzietan, ikasketa ofizialak, berezko tituluak edota formakuntzak dituzte aukeran ikasleek. "Prestakuntza zabala, gaurkotua eta kalitatezkoa", irakaskuntza-eredu erdipresentziala baliatuz.

Bertakoak

Euskararekin zein gizartearekin duten "lotura indartu eta errazteko" eman dute Goiena Komunikazio Taldearekin elkarlanean hasteko urratsa; ingurunearekin "harremanak sendotzeko", alegia. Ikasketa ofizialetan bertako hizkuntzak presentziarik ez duen arren, eguneroko errealitatean eta programazio propioan euskarari dagokion espazioa eskaintzen diote. Udazkenean, esaterako, euskara hutsean izango diren sei ikastaro eskainiko dituzte, zuzenbidea, komunikazioa, historia, zinema, dantza eta musika oinarri hartuta.

Aurrera begira

Udako atsedenaren atarian, jarriak dira 2022-2023ko ikasturteari begira. Datorren eguaztenean, ekainak 22, aurkeztuko dute, Donostiako Koldo Mitxelenan (19:00), esku artean izango duten eskaintza; egun berean irekiko dute matrikulazio epea. Zenbakitan, Bergarako hezkuntza zentroan 30 gradu, 11 gradu bikoitz, 80 master, 20 doktoretza programa, 12 mikrogradu eta mikromaster bat kudeatuko dituzte. Bi berritasun nagusirekin: Haur Hezkuntzako eta Energien Ingeniaritzako graduak. Formakuntza propio zein jarraituak ere izango dira aukeran.

"Eredu desberdinetan emandako prestakuntza integrala" baitute izatearen oinarri, eta urratutako bideari eutsi eta hobetzea baitute xede. Hala nahi duenak, badu non aukeratu.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak