Atzo eman zitzaion hasiera Zientzia, Berrikuntza eta Teknologia (ZTB) jardunaldiaren zazpigarren edizioari. Bergarako Udalak, Laboratorium Zientzia Museoak eta Enpresarek antolatutako ekimenaren baitan egingo diren zazpi hitzaldietatik lehena izan zen Jose Miguel Mulet zientzia ikertzaile eta dibulgatzaile valentziarrak eskainitakoa. Hitzaldiez harago ere izango da non gozatu, astean Hemen Debagoiena saioan egindako erreportajean azaldu bezala.
Ekologismo erreala. Zientziaren ikuspegitik, zer egin dezakezu planeta babesteko hitzaldia klima-aldaketan eta ingurumenaren zaintzan oinarritu zen, beti ere ikuspegi zientifikotik abiatuta. Ingurumenaren zaintzari eta gizakien elikadurari begira, "aukera iraunkorrenetako bat" intsektuetatik etorriko litzateke Muleten arabera, eta intsektuak landatzeko apustua egingo luke. Hala ere, intsektuen bidezko elikadura gaur egun "arazo kulturala denez", ingurumenean "eragiten ari garen inpaktua murrizteko" arrain, fruta eta barazki gehiago eta haragi gutxiago jatea proposatu zuen Valentziako Unibertsitate Politeknikoko Biotekonologiako katedradunak. Ondoko estekan dago hitzaldi osoa ikusgai.
Hilaren 27an hurrengoa
Datorren eguaztenean, urriak 27, egingo da ZTB jardunaldietako bigarren hitzaldia. Kasu honetan, Robotika Inklusiboa eta Adimen Artifiziala komunitate osoaren onerako: erronka etikoa gaia hartuko du hizketagai Txetxu Ausin zientzialariak, eta Seminarixoan bertan zein online jarraitzeko aukera egongo da.
Informazio osatua zein egitarau osoa ztbergara.eus webgunean dago eskuragai.
