Maite Fernandezek eta Aida Payal Arte Ederrak ikasi zuten, eta, ostean, zaharberritzean espezializatu ziren. Eta aldarrikapen horrekin hasi dute Laboratorium Museoan egindako hitzaldia. Zaharberritzaile baten lanaren nondik norakoak azaldu dituzte. Berritu behar duten artelana eurengana heltzen denetik, prozesua bukatzen den arte jarraitzen duten bidea azaldu dute. "Hasieran artelanari buruzko dokumentazioa eta ikerketa lana egiten dugu. Hortik, datu asko jasotzen ditugu. Ostean, egin beharreko lanak zehazten ditugu. Azken pausua, zaharberritzea egitea da", azaldu du Aida Payak.
Zaharberritzaileen lana oso gutxi baloratzen dela salatu dute. Eta, puntu horretan, lanbide horretan dagoen intrusismoa azaleratu dute. "Ondo zaharberritutako lan asko egiten dira, baina, hedabideetan agertzen dena Cecilia andereak zaharberritutako Borjako Ecce Hommoa agertzen da. Artelanak zaharberritzea ez da eskulanak egitea", aldarrikatu dute.
Bergaran, hainbat zaharberritze
Olaso etxeko lorategian dagoen armarria, San Pedro parrokiako San Pedroren irudia eta Hilzoriko Kristoaren kapera dira Artez enpresak, Bergaran, zaharberritu dituen artelanetako batzuk. Herritarren aurrean egindako agerraldian Laboratorium Museoan zaharberritutako pieza batzuk erakutsi dituzte: Santa Barbararen irudia, Zientzia Instrumentuen erakusketako Haldaz aparatua eta Tavesa enpresako baskula eta planetario bat, besteak beste. "Oso inportantea da zaharberritzaileek egiten duten lana. Guretzat, ezinbestekoa. Urtero daukagu partida bat zaharberritzeak egin ahal izateko", esan du Laboratorium Museoko arduradun Rosa Errazkinek.