Bergarako erretiratuen eta pentsionistekin batera, beste hainbat herritar ere batu dira protestara. Batzordeko Itziar Usandizagak dio "itxaropen handia" zutela jarrita Toledoko itunean: "Itxaropen handia jarrita genuen, gure egoera hobetzeko hobekuntzak espero genituelako. Baina orain murrizketa handiekin aurkitu gara". 2010eko eta 2012ko lan-erreformak baliogabetu ez izana bereziki larria ikusten du Usandizagak. "Pentsioen igoera oso eskasa da oro har eta egoera okerrenean daudenei igoera altuagoa izan da ere, oso pentsio baxuekin geratuko dira. Eta ezin dugu ahaztu alargunen egoera... Horregatik, tinko, irmo eta ozen aldarrikatzera gatoz Toledoko itunak aintzat hartu behar gaituela; gure aldarrikapenak minimoak dira", gaineratu du.
Toledoko Itunean hobekuntzak behar dituztela berretsi dute: "Toledoko Itunaren gomendioek agerian utzi dute orain arte esaten zigutena, Gizarte Segurantza Publikoa bideragarri ezina dela eta pentsioak KPIren arabera igotzea ezinezkoa dela. Diskurtso hori era maltzurrean puztu dute botere ekonomiko handiek, eta, aldi berean, pentsio indibidual edo kolektiboen funts pribatuak bultzatzea proposatu dute. Sakoneko erreforma fiskala behar dugu, benetan sarrera handienak dituztenek gehiago ordain dezaten".
1.080 euroko gutxieneko pentsioa
Aldarrikapenen artean 1.080 euroko gutxieneko pentsioa aldarrikatzen dute baina badituzte beste eskaera batzuk ere: "40 urte kotizatuta dituzten erretiro aurreratuaren koefiziente murriztaileak indargabetzea; soldatetan eta pentsioetan dagoen genero-arrakalarekin amaitzeko neurriak, edo alarguntza-pentsioaren oinarri arautzailea %100eraino igotzea, diru-sarreren iturri bakar gisa".
Etorkizunerako borroka
Gaur egungo eskaerak etorkizunera begirakoak ere badirela nabarmendu dute: "Gure pentsiodun eta erretiratuentzat nahi ditugun konponbideak, denontzako nahi ditugu. Oraingo eta baita etorkizunerako ere, gaurko pentsiodun eta jubilatuentzat eta baita gure oinordekoak izango direnentzat".
Gipuzkoako 18 herritan
Arrasaten, Oñatin eta Antzuolan ere egin dituzte manifestazioak Debagoienean eta Gipuzkoan, guztira, 18 herritan irten dira kalera erretiratu eta pentsiodunak. Adierazi dute euren eskaerak aintzat hartu arte kalera irteten jarraituko dutela.
