Iñigo Urkullu buru, Jaurlaritzako ordezkaritza zabala etorri da gaur goizean Bergarara, Miguel Altuna Lanbide Heziketa ikastetxe berria bisitatzera. Bertan izan dira Hezkuntza Sailburu Cristina Uriarte, Lanbide Heziketako kontseilariorde Jorge Arevalo eta Administrazio eta Zerbitzuen sailburuorde Olatz Garamendi.
Zentroko zuzendari Josune Irabazalek ongi etorria eman ostean, ikastetxe berrituko hainbat gune bisitatu dituzte, atalez atal. Administrazio gelan hasi dira, eta jarraian enpresa simulazio gelara joan dira, non ikasleek enpresa ataletan banatuta egiten duten lan. Jarraian makina aurreratuekin egiten dituzten produktuak ikusi dituzte eta handik tailerrera jaitsi dira. Ikasleak askotariko zereginak egiten ikusi ostean, adierazpenak egin dituzte Irabazabalek eta Urkulluk.
Josune Irabazalek eskerrak eman dizkie Jaurlaritzako ordezkariei zentro berria egiteko baliabideak jartzeagatik. "Lekuz aldatzeko garaia heldu zaigu, eta hemen daukagu eraikin berria: handia, modernoa, garai honetakoa eta ikasleek merezi dituzten instalazioak eta ekipamenduak ditugu. Gure erronketako bat eraikin adimentsu bat egitea zen. Baina guk pertsona adimentsuen gaitasunak hobetzeko eraikina egin dugu". Zubiaren sinbologia ere nabarmendu du Irabazalek: "Lehengo eskolak, guretzat Elementala bezala ezagunagoa zenak, bazuen elementu kuttun bat: zubia. Hori dela eta, eraikin berriak ere badu zubia eta Zure zubia leloa aukeratu dugu eskola berriarentzat. Iragana eta etorkizuna lotuko dituen zubia izan nahi dugu".
Ostean Iñigo Urkullu lehendakariak hartu du hitza: "Bergarako zentro hau Lanbide Heziketan gertatzen ari den paradigma aldaketaren adibide bat da. Prestakuntza aldatzen ari da, irakaskuntzak metodologia berriak eskatzen ditu, ikasgelak elkarri lotuta daude eta ikasleen arteko lankidetza da bultzatzen dena. Miguel Altuna ikastetxea aitzindaria da Euskadin. Eusko Jaurlaritzak zortzi milioi euro inbertitu ditu ikastetxe berri honetan; inguruak eskatzen zuen inbertsioa bat zen eta gaur egun errealitate da".
Amaieran, emakumeek industria ikasketetan duten presentzia handitzeko erronka aipatu du lehendakariak: "Industriarekin lotutako ikasketetara emakumeak erakartzen ahalegintzen gara, eta helburu hori betetzeko Steam estrategia garatzen ari gara. Hori da gure ekarpena soldata arrakala gainditzeko eta gizonen eta emakumeen arteko benetako berdintasuna lortzeko".
Ikastetxearen egoera
Miguel Altuna ikastetxeak 600 ikasletik gora izango ditu 2019-2020 ikasturtean, zortzi prestakuntza ziklotan banatuta. Hauek dira erdi-mailako prestakuntza zikloak: administrazio kudeaketa, instalazio elektrikoak eta automatikoak eta mekanizazioa. Honako hauek, ordea, goi-mailakoak: administrazioa eta finantzak, automatizazioa eta robotika industriala, produkzioaren programazioa fabrikazio mekanikoan, diseinua fabrikazio mekanikoan eta mekatronika industriala.
