Erleari eta erlauntzei buruzko erakusketaren inguruan ibili dira herritarrak. Ezti ezberdinak probatzeko aukera izan dute. Ekoizle ezberdinen azalpenak entzun dituzte beste hainbatek, eta eztia ez ezik, erleek egindako lanari esker, beste produktu batzuk egin daitezkeela ere ikusi dute. Adibidez, kremak. "Gehienek eztia jan egiten dute, jogurtarekin, kafearekin... Baina, beste produktu batzuk daudela ezagutarazi behar dugu", esan dute.
Eztiak, kremak, gaztak, barritak, bonboiak, txokolatedun intxaurrak... horiek guztiak probatzeko aukera egon da. Probatzeko eta erosteko. "Goiz ederra izan da. Herritarrek probatu eta erosi egin dute, eta eskertzekoa da hori", esan dute antolatzaileek.
Bailarako ekoizleak
Oraindik ere ezezaguna da erlezainen lana Debagoienean. Bailaran badaude ekoizle txikiak. 60 bat, eta euren lana ezagutzera ematea ezinbestekoa da. Horietako bat da Jose Antonio Azkarate bergararra. Duela urtebete erlategi bat erosi zuen Oñatiko Araotz auzoan. "Nire lehenengo azoka izan da, eta pozik nago goizak emandakoarekin. Berria naiz lanbide honetan. Oraindik asko daukat ikasteko, baina esan dezaket, erlezain izateak ñabardura asko dituela. Lan nekeza da, baina, era berean, gustagarria", esan du.
Tailerrak
Erleak dituen ezaugarriak, onurak eta arriskuak ezagutu ostean, txikienek tailerrak egin dituzte. Alde batetik, kandelak egin dituzte argizariekin; eta bestetik, barrita energetikoak. Gainera, jogurta eztiarekin jateko aukera izan dute.
