Atseden hartzeko unea da?
Bai, halaxe sentitzen dut. Bergarara Soraluzetik etorri nintzen, eta deia jaso aurretik atseden hartzea zen nire asmoa. Baina Bergarari baiezkoa eman nion, eta intentsitate handiko lau urte dira, urte onak. Orain, denbora familiari eskaintzeko ordua dela sentitzen dut.
Ze balorazio egiten duzu urte hauetaz?
Balorazio ona, zalantza barik. Bergarara etorri nintzenean banekien klub hau Gipuzkoa mailako talde handietako bat zela, eta ez zegokion kategorian zegoela. Lehenengo urtean, mailaz igotzeko borrokan ibili ginen azken momentura arte, eta urte hartan Mondra igo zen gora. Hurrengo urtean, gu igo ginen Ohorezko Erregional Mailara, eta, kategoria berrian, lehenengo urtean oso denboraldi polita egin genuen, bosgarren sailkatu ginen.
Aurten, gehiago kostatu zaizue lasaitasun postuetan ibiltzea.
Bai. Aurten, atzean ibiltzea egokitu zaigu, baina, sailkapenak erakusten ez badu ere –14. amaitu dute–, urte garrantzitsua izan da Bergararendako. Jokalari gazteen aldeko apustua egin dugu, oso talde gaztea izan dugu lehiatzeko, eta minutu asko banatu ditugu gazte horien artean. Hori garrantzitsua da, gazteek izan dituzten minutu horiek baliagarriak izango direlako datorren urtean lehenengo taldeko erritmoan jokatzeko, Ohorezko Erregionaleko erritmoan ondo jarduteko.
Zelan ikusten duzu kluba?
Zuzendaritza talde honekin batera hasi ginen gu ere Bergaran, eta lau urte hauetan ikusi dut gauza on asko egin dituztela. Uste dut etorkizunerako oinarri sendoa jartzen dabiltzala, eta jokalari gazteen aldeko apustua garbia da. Nire partetik, lanerako jokalarien erabateko konpromisoa izan dut, eta klubaren partetik konfiantza transmititu didate beti, eta lanerako askatasun osoa izan dut.
