Egubakoitzean bertan hasiko dute Mahonero Eguna, nahiz eta egun handia zapatukoa izango den. Hala, egubakoitzean, 19:00etan hasita, gauera arte luzatuko dira ekintzak; buruhandiak egongo dira, parrillada eta musika gaua Elvis Caino Dj-aren eskutik. Zapatu goiza, berriz, umeendako izango da: puzgarriak, jolasak, futbol ginkana, dantza… Eguerdian nagusiendako triki-poteoa egongo da eta ondoren elkarrekin bazkalduko dute denek: "Seminarioko karpan egingo dugun herri bazkarirako azken txartelak salgai daude Depor tabernan egubakoitz eguerdira arte –nagusiek 20 euro eta umeek 15 euro–". Eta, bazkalostean iritsiko da asteburuko momentu gogoangarrietako bat, Mahonero sariak banatuko dituzte-eta.
Udako kanpusa abian
Aurten ere Udako kanpusa egingo du Bergara KEk. Ekaineko txanda dagoeneko beteta dago; eta uztailaren 1etik 5erako txandan izena emateko hona idatzi: kanpusbke@gmail.com.
