Etxeko langile moduan diharduten emakumeen errealitatea, ez da erreza. Sektore prekarizatua da oso –900 euroko soldatak dira nagusi, orduko 5,63 euroko ordainsariekin– eta paperik gabekoen kasuan, baldintzak are okerragoak dira. Gaurkoan 20 emakume batu dira kartzela zaharrean, Bidez bide elkarteak antolatu duen tailer informatiboan parte hartzeko. Latinoamerikarrak, musulmanak, bertakoak, etorri berriak, duela 10 urte baino gehiago etorritakoak, ... guztiek adi-adi entzun dituzte Bidez bide elkarteko Katia Reimberg-ek emandako azalpenak, eta parte hartze handia izan da, zalantza eta egoera pertsonal ugari partekatu dituztelako.
Askotariko gaiak jorratu dituzte:
- soldata minimoak
- Urteko pagak
- Eskubideak eta araudiak
- Soldata hainbanatuak
- Kurtso sozio-sanitarioak
- Nominak eskatzearen beharrak
- Bankuetan kontuak zabaltzeko paperik ez dutenen zailtasunak
- Elkarren arteko laguntza
- Erroldatzeko zailtasunak
- Bajak
- Oporraldiak
- Kotizazioak
Paperik ez dutenek hiru urtez erroldatuta egon direla ziurtatu behar dute paperak lortzeko, eta hori lortu bitartean are baldintza kaxkarragotan egiten dute lan: kontraturik gabe, bajak kobratzeko zailtasunekin, eskubiderik gabe...
Baina ikasgai orokor bat ere barneratu dute. Norberak plazaratu dituen egoeretatik harago, inmigrazio zein lan araudi injustu batzuen menpe dauden kolektibo bat direla, eta euren egoera hobetzeko antolatu eta mobilizatzeko beharra daukatela.