Boluko malda egonkortzeko lanean ari da Udala, 2017ko urtarrilaren 16an mendi zati bat behera etorri zenetik. Ingek SLP enpresak gunearen azterketa geologikoa eta geoteknikoa egin zuen, edozein interbentzioren aurrean izan zitezkeen arriskuak neurtzeko. Gero, 2018ko martxoan, Udalak Ingek eta Sestra enpresei mendi-hegala egonkortzeko proiektuaren idazketa esleitu zien.
Lehena, pantaila metaliko bat
Lanon helburua da mugitutako mendi-hegala egonkortzea, bi eremutan –mugitu zena eta haren gainekoa– segurtasun neurriak areagotzea eta bidegorri-pasabidearen plataforma egokitzea. Horretarako, hiru fase aurreikusten dira: lehen fasean, mugitutako hegalaren parean dagoen pasabidearen plataforman segurtasunerako pantaila metaliko bat ezarriko dute; 3S Geotech enpresa kontratatu dute horretarako eta "lehenbailehen" hasiko dira lanean (33.380 euro). Bigarren fasean, mugitutako hegala egonkortuko dute, eta lanak uda partean hastea dago aurreikusita; mikropiloteak sartuko dira eta ura bideratzeko kanal bat sortu, besteak beste (456.201 euro). Gaineko eremua egonkortzeko lanak epe luzera begira daude aurreikusita (122.734 euro). Hiru faseen aurrekontua 612.315 euro da.
Elena Lete alkateak atzoko agerraldian esan zuen hasieratik ingurune horren gainean egon direla: "Etengabeko jarraipena egin diogu, edozein mugimendu gertatuz gero, berehala erantzuteko. Sare dinamikoa ere ezarri genuen, eta sare horrekin segurtasuna %100ean bermatzea lortu".
Azkena, urtarrilaren 31 gauean
Azken lur-jausia urtarrilaren 31tik otsailaren 1erako gauean gertatu zen; hamar metro kubiko inguru behera etorri ziren. "Eguen arratsaldean eremua ondo zegoen, baina 19:00etatik 00:00etara euri mordoa egin zuenez, uste dugu horrek eragin zuela lur-jausia. Zorionez, sareak bete zuen bere funtzioa; egubakoitzean hasi ginen hamar metro kubiko horiek kentzen eta, espero baino askoz gehiago kostatu arren, iluntzerako garbitu genuen guztia", adierazi du Obra eta Zerbitzuetako zinegotzi Lander Arregik.
Gobernuaren arabera, obrak hasteko moduan daude dagoeneko: "Eremuari behin betiko soluzioa eman ahalko diogu. Lur-jabeekin hitzarmena sinatzera goaz eta zabalduko dira eremu horri bestelako erabilerak emateko aukerak". Horien artean, Gobernuak erabilera publikorako ortu batzuk egokitzea du aurreikusita.