Bergarako Hilzoriko Kristoa, Sevillarako bidean

Galeria Garduño enpresako ordezkariek 4x2 metroko kaxan sartuta atera dute San Pedro parrokiatik. Furgonetan egingo du harainoko bidaia. Andaluziako Ondare Historikoaren Institutuak eraberrituko du, eta, ostean,  Karmeldarren komentuko erakusketan erakutsiko dute Pablo Rojasen eta Martinez Montañesen beste lan batzuekin.

Sevillatik propio etorritako teknikoek jaitsi dute Juan de Mesak egindako lana paretatik lurrera. 2,10 metroko altuera eta 150 bat kiloko pisua duen irudia izanik, asko kosta zaie eskultura paretatik kentzea. Hainbat saiakeren ostean, irudiaren neurriak ikusita, kaperako aldare-mahaia mugitzea erabaki dute. Horren ostean, aldamio baten eta eskailera biren laguntzarekin, Hilzoriko Kristoa lurrean ipini dute, bost lagunen artean.

Ostean, neurrira egindako kaxan sartu dute eta askotariko babesgarriak ipini dizkiote, Sevillarainoko bidea modu seguruan egiteko. "Esperientzia handia daukagu halako lanetan, eta, irudiak duen balioa aintzat hartuta, hartu beharreko neurri guztiak hartu ditugu, eskultura egoera onean iristeko", esan du lekualdaketa egiteko ardura duen enpresako buru Luis Garduñok.

Eraberritzea, Sevillan

Andaluziako Ondare Historikoaren Institutuak eraberrituko du Mesaren lana. Baina, Elizbarrutiko ordezkari Koldo Apeztegiaren irizpideak aintzat hartuta. Eraberritzeren iraupenak baldintzatuko du erakusketaren hasiera. "Hilabete baino gehiago beharko du eraberritze lanak. Horren ostean zabalduko dute erakusketa. Beste hilabetez egongo da ikusgai Sevillan, eta, ondoren ekarriko dute bueltan", esan du Jon Molina parrokoak.

Rojas, Mesa eta Martinez Montañes

Karmeldarren komentuko Sevillako eliza horretan dagoen Martinez Montañesen Santo Kristoaren laugarren mendeurrena betetzen da orain. Hala, Bergarakoarekin eta Granadako Seminario nagusian dagoen Pablo Rojasen beste lan batekin,  hiru lanak erakutsiko dituzte hilabetez. Hiru belaunaldi ezberdinetako artisten lanak batera egongo dira. "Sevillan oso estimatuak dira hiru artistak. Esango nuke erantzun handia izango duela erakusketak. 70.000 bat pertsona hurbil daitezke lanak ikustera", esan du Luis Garduñok.

 

Erlazionatuak

Bergarako Hilzoriko Kristoa Sevillara eramateko operazioa

Bergara

Atzo eraman zuten Hilzoriko Kristoa Bergarako San Pedro parrokiatik Sevillara. Tentuz egindakoa izan zen irudia bere ohiko lekutik atera eta bidaia...

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.