Duela urtebete aurkeztu zen Ternua Group borondatezko hartzekodunen lehiaketara, ezin ziolako 16 milioiko zorrari aurre egin. Hala, taldearen baitako markak saltzen joan dira pixkanaka: Ternua, Dikar kooperatibak erosi zuen; Loreak Mendian marka sortzaile ohiek; eta, Lorpen berriz, enpresako langileek. Saltzeko gelditzen zena, Astore zen, hain zuzen. Eta, hainbat komunikabidek baieztatu dutenez, Errioxako Oxium enpresak erosi du azkenean kirol-arropa marka historikoa, 60.000 euroren truke -72.600 euro BEZa barne-.
Maspormenos-ekin lotura
Errioxako Arnedon egoitza duen sozietate mugatua, Maspormenos enpresarekin lotuta dago; urtarrilean Astoreren stock guztia erosi zuen enpresa. Orain, Astore bera erosi du Oxiumek, baina ez ezarritako hasierako prezioan, hau da, 150.000 euro, –markaren potentziala eta webguneko bisiten azterketan ezarritako prezioa–, baizik eta 60.000 euro eta 12.600 euroko BEZaren truke.
Hartzekodunen lehiaketa amaituta
Azken salmenta honekin, amaitutzat ematen da Ternua Group-en hartzekodunen prozedura, duela urtebete Debagoieneko eskualdea astindu zuena. Azkenean, ehun bat lanpostu salbatu dira, eta kaleratze-espedientean geratu ziren Ternua Group-eko 70 langileek dagokien kalte-ordaina jaso zuten, –guztira, 2,5 milioi euro baino gehiago– Fogasara jo beharrik gabe.
