Etxebizitzaren egoera "larria" dela jakitun, Arrasateko egoera zein den, herria tentsio handiko bizitegi-eremu izendatzeak zer esan nahi duen eta datozen urteetarako Udalak zein asmo edo plan dituen herritarrei azaltzeko jende aurreko aurkezpena egin zuen Arrasateko Udalak atzo arratsaldean Kuturateko areto nagusian. Maider Morras alkateak, Garazi San Migel hirigintzako batzordeburuak eta planaren txostena egin duten Imanol Esnaolak eta Gillen Txintxurretak eman zituzten azalpenak. Entzutera joan ziren herritarren artean zeuden, adibidez, gazteendako zein helduendako etxebizitzak egiteko Udalak erosi duen La Merced eraikineko bi moja.
Planaren aurkezpena, etxebizitzaren egoeraren diagnosia erakusten hasi ziren gero hurrengo hamabost bat urterako izan daitekeen plana azaltzeko. Maider Morras alkateak adierazi zuen moduan, Udalak dituen baliabideen eta eskuduntzen barruan egindako etxebizitza plana da aurkeztu dutena, "dena ez baitago Udalaren esku".
