SUDC elkarteak antolatuta, ohiko doke txapelketa jokatu da gaur goizean Monteazpin, 42. aldiz. Eguraldi bikainarekin hasi da goiza, eta 10:00etan zabaldu dute izen-ematea. Hala ere, parte-hartzea espero baino apalagoa izan da: Arrasateko 25 elkarte gastronomikotatik zortzik hartu dute parte aurtengoan –Ziar-ola, Udalpe, Santa Marina, Leze Txiki, Amaika Gazte, Alkartu, San Isidro eta Txalaparta–.
Juan Luis Arkauz SUCDko lehendakariak adierazi duenez, “penagarria da 25 elkarte izanda zortzi bakarrik etortzea; guk hamabi edo hamabost espero genituen”. Hala ere, txapelketa ondo joan da: elkarteetako bikoteek zozketaren bidez erabakitako aurkarien aurka jokatu dute, 50 puntura arteko partidak eginez eta pixkanaka faseak gaindituz.
Euren artean jokatu ostean, lau talderik onenak finalerdietara iritsi dira. Leze Txiki eta Alkartu izan dira hirugarren postuaren bila lehiatu direnak, eta Leze Txikik eskuratu du podiumeko azken tokia. Finalean, Ziar-ola eta San Isidro izan dira aurrez aurre, eta azkenik, Ziar-ola izan da berriz ere txapeldun.
Udala oraingoan ere garaitua
Finala amaituta, ohiturari jarraituz, txapeldunek Udaleko ordezkarien aurka jokatu dute. Kapa Urteaga eta Andoni Arratibel izan dira udala ordezkatzen saiatu direnak, baina ezin izan dituzte Ziar-olako kideak menderatu. Hori ikusita, hamaiketakoa –40 kilo sardina eta ardoa, aurten berdel gutxi zegoelako sardina aukeratu dute– udalaren kontura izan da.
Eguraldia lagun izan bada ere, parte-hartze apalak ilundu du zertxobait giroa. Hala ere, Arkauzek nabarmendu du pozik dagoela etorritako jendearekin: “Lana hartzen dugu dena prestatzen, eta parte-hartze txikia dela ikustea tristea da, baina gustura egon gara gerturatu direnekin”.
