Martxoaren 27an, eguenean, egin zen kontsulta epeko bigarren bilera Ekideko zuzendaritzaren eta langileen ordezkarien artean, LABek ohar baten bidez adierazi duenez, eta, horren ondoren jakinarazi du ez duela "behartutako kaleratzerik" onartuko: "Aldez aurretik, enpresak kaltetuen zerrenda negoziatzeko borondatea agertu zuen, enpresatik irteteko borondatea erakutsi dezaketen pertsonak bilatzeko ahalegina eginez. Sindikatuok, era berean, hitza eman genuen ez genuela zerrenda horretara sartzea erabakitzen duten langileen borondatearen aurka egingo". Halere, erantsi du, gaur-gaurkoz, enpresak "ez duela inolako urratsik egin" horri dagokionez.
LABen esanetan, EEEak kaltetutako langileak "modu hitzartuan" ateratzea ahalbideratzeko "modu bakarra kalte ordainak legez ezarritakoaren gainetik handitzea da", baina adierazi du enpresak dioela horrek arriskuan jarriko lukeela bere etorkizuna: "Guk gure buruari galdetzen diogu: goi zuzendaritzako soldatek ez dute arriskuan jartzen enpresaren bideragarritasuna? Sozietatearen administratzaileek 295.254,94 euro jaso zituzten 2021ean, eta 314.838,43, 2022an. Ohikoa izan da dibidenduen banaketa, hiru ekitalditan (2017, 2018, 2019) milioi bat euro baino gehiago atera baitzen enpresatik bazkideen artean banatzeko. Horretaz ari gara, halaber, egungo egoeraren errua zuzendaritzari egozteko orduan".
Hala, azpimarratu du "eskari argia" duela: "Kaltetuaren onespenik gabeko kaleratzerik ez, eta kalte ordainak hobetzea".
