LABek ohar baten bidez jakinarazi duenez, Ekideko enpresa batzordea zuzendaritzarekin batzartu da gaur, martxoak 14, eta ohartarazpen bat jaso dute: "Jakinarazi digute kaleratze kolektibo baterako espedientea abiarazten duela enpresak. Zuzendaritzari langile batzordearekin negoziatzea eskatu diogu behin eta berriro, beraien gestio txarraren ondorioak ez daitezen soilik langileentzat izan. Horrez gain, enpresaren etorkizunari buruzko negoziaketa bat irekitzeko gonbita ere luzatu diegu, hartu beharreko trantsizio neurriei buruz hitz egiteko".
Hala, sindikatuak erantsi du bilera egutegi bat zehaztu dutela gaurko batzarrean, eta datorren eguenean, martxoaren 20an, izango dutela "kontsulta epeko" lehena.
Kaleratze gehiago
Sindikatuak ohartarazi du iazko azken hiruhilekoan enpresak "kaleratze batzuk" egin zituela, eta orduan antolatutako mobilizazio eta lanuzteetan ere eskakizun izan zutela "kaleratze horiek baliogabe uztea eta aurrera begirako enplegu bermea".
