Urtarrilean hasi eta urrira arte, askotariko ekintzak batuko dituen egitaraua prestatu du Ekin Emakumeak Elkarteak. "Ospatzeko baliatu gura dugu egitaraua eta elkarteari merezi duen aitortza egin nahi diogu modu horretan. 25. urteurrena ezin izan genuen ospatu, pandemia garaian geundelako; beraz, ospakizun handiagoa eta garrantzitsuagoa egin nahi dugu orain", adierazi du elkarteko kide Oihane Pildainek. "Gura duguna da gure elkarteari ikusgarritasuna ematea, herrira zabaltzea. Horrez gain, guk egiten ditugun ekintzen eta gure lan-ildoen berri ere eman nahi diogu herriari", gaineratu du.
30 urte, berrekin, ekin, elkarrekin da urteurreneko leloa eta erreferentzia egiten die elkartearen lau oinarriei, urteurreneko egitarauaren arduradun Ainara Alkortaren esanetan. "30 urte memoria historikoarekin lotuko genuke; berrekin, feminismoarekin; ekin, euskararekin eta elkarrekin, aniztasunarekin. Urteurreneko ekintzetan landuko ditugun gaiak izango dira".
Materiala eta informazioa batzen ari dira
Memoria historikoarekin gaiari azpimarra berezia jarri gura izan diote. "Urteurren honetan landuko dugun gai nagusietako bat izango da. Ekinen ibilbidean egon izan diren pertsonei elkarrizketak egiten eta informazioa eskatzen ari gara eta informazio horrekin guztiarekin, erakusketa moduko bat egingo dugu urrian". Hori dela eta, deialdia zabaldu gura diete herritarrei. "Edozeinek Ekin Emakumeak Elkartearen historiari lotutako informaziorik, argazkirik edo bestelako materialik edukiz gero, gurekin harremanetan jar dadila. Asko eskertuko diogu laguntza".
Elkartearekin harremanetan jartzeko, hainbat bide daude: 943 79 83 70 eta 651 70 79 36 telefono zenbakiak edo emakumeak@ekinemakumeak.eus helbide elektronikoa.
Herritarrei, saioetara joateko deia
Martitzenetan egingo dituzte ekintza guztiak eta lehena urtarrilaren 21ean izango da, Kulturateko Jokin Zaitegi gelan, 18:30ean. "Euskara harrera hizkuntza den edo ez hausnartzeko saio ireki bat izango da eta jana ere egongo da. Beraz, herritarrak animatu gura ditugu parte hartzera", dio elkarteko kide Laura Buenok. "Gainera, zaintza zerbitzua ere egongo da, Txatxilipurdi Elkartearen eskutik", gehitu du. Paloma Martinez Perez eta Onintza Olaizola arduratuko dira gaia lantzeaz.
Nabarmendu dute Ekin Emakumeak Elkartea "oso elkarte inportantea" dela herrian. "Harrera zerbitzua guk daramagu, gure elkartetik jende asko pasatzen da eta bada garaia guk egiten dugun lana ezagutarazteko. Beraz, memoria historikoarekiko, feminismoarekiko, euskararekiko eta aniztasunarekiko interesa dutenak gure saioetara joatera animatzen ditugu, baita gainontzeko herritar guztiak ere".
