Biribilgune ondoan zeuden aparkatuta. "17:00ak edo 18:00ak izango ziren, langile guztiak lantegietatik ateratzen ari baitziren. Arimazubi plaza ingurua kaos hutsa izaten zen, autoz gainezka egon ohi zen". Halako batean, tiro hotsak entzuten hasi zela dio. "Konturatu orduko, bi tiro jaso nituen ezkerreko sorbaldan, autoko kristala zeharkatuta. Nire osabak hala aginduta, autotik korrika atera ginen hiruok. Biribilgune ondoan tindategi bat zuen izebak, eta hara joan ginen. Orduan konturatu nintzen odoletan nengoela eta laguntza behar nuela". Hori ikusita, tindategitik irten eta auto bat gelditu zuten. "Zentro asistentzialera eraman ninduten, eta, autotik irten bezain pronto, zentroko atean, mareatu egin nintzen, odol asko galduta". Antza, zentrora iritsi zen lehen zauritua izan zen. "Larrialdietan esnatu nintzen, eta, esnatzearekin batera, guardia zibilak gainean nituen, besotik tiraka eta galderak eginez, komandoko kidea nintzelakoan", Kasualitatez, gainera, egun hartan elektronikako praktikak egin zituela adierazi du, eta pieza elektroniko batzuk gainean zituela. "Horrek okertu egin zuen egoera, ez zidatelako sinisten. Uste zuten lehergailuak prestatzeko erabiliko nituela". Orduko hartan, mojak arduratzen ziren zentro asistentzialaren kudeaketaz. "Mojetako batek bisturiarekin mehatxu egin zien guardia zibilei, eta zentrotik bota zituen. Bedelak, bitartean, logeletako batean ezkutatu ninduen, egoera lasaitu arte, eta 21:00etan egin zidaten ebakuntza".
Espainiako Gobernuak, 150.000 pezetako indemnizazioa
Hamabost egun pasa zituen zentroan, eta besoa "nahiko ondo" errekuperatu zuela aitortu du. Edozelan ere, dio ez duela ez barkamenik ez aitortzarik jaso Guardia Zibilaren edota Espainiako Gobernuaren partetik. "Ez gaituzte sekula terrorismoaren biktima gisa aitortu". Indemnizazioa eskatu zuen. "150.000 pezeta baino ez nituen jaso Espainiako Gobernuarengandik". Eusko Jaurlaritzak, gerora, polizia indarkeriaren biktima gisa aitortu zuen.
