Astelehenean hasi zituzten ekintzak, eta Arrasate Institutuko DBH3ko ikasleentzat zuzendutako jarduerak izan ziren Garaia Parke Teknologikoan eta baita Iturripeko campusean ere.
Laborategietan bisitak
Maite Anaya Rodriguezek, Mondragon Goi Eskola Politeknikoko Orientazioko Koordinatzaileak azaldu du zer egin zuten atzoko egunean: "Gaurkoan scape room bat egin dugu, eta, gero, bisita gidatua egin dute ingeniaritzako laborategi ezberdinak ikusteko. Gero, astean zehar tailerrak egongo dira, mahai inguruak… ZTIM arloak eta bokazioak pizteko ekintza ezberdinak".
Hiru laborategi ikusi dituzte: Prototipatzeko irudi laborategia, biomaterialak eta konpositeena. Gustura izan ziren ikasleak bertan ikusitakoen gainean galdetzen.
Egitarau betea
Zientzia eta Teknologia Asteari hasiera emanda, azaroaren 13an, asteazkena, Danobatgroup talde kooperatibo eta industrialeko ordezkariek hitzaldia eskainiko dute Garaian; Euskal Herriko parke naturalen appa lantegia egingo da, ikasleek parke naturalen inguruko aplikazioa diseinatzen ikas dezaten.
Azaroaren 14an, eguenean, programazio-lantegia egingo da Garaian, eta ikasleek familiekin batera bertaratzeko aukera izango dute. Adimen artifizialaren etorkizuneko erronkak ulertuko dituzte, pentsamendu kritikoa garatu eta arazoak konponduko dituzte. Programazioaren funtsen berri ere jasoz.
Zientziaren eta Teknologiaren Nazioarteko Asteko jarduerekin bukatzeko, azaroaren 15ean, ostiralean, Zientzia eta Teknologia arloan erreferente diren zenbait lagunen parte-hartzearekin. Gazteek gai zientifiko-teknologikoen inguruan dituzten zalantzak argituko dituzte bertan. Era berean, bisita gidatua egingo da, Garaia parke teknologikoa osatzen duten enpresak ezagutzeko.
Arrautza jaurtiketa
Aurtengoan ere ez da faltako arrautza-jaurtiketako txapelketa. Orain dela 25 urte hasi zen Mondragon Unibertsitatea ekitaldia antolatzen, ikasleei gelan ikasitako gaitasun zientifiko-teknologikoak praktikan jartzen laguntzeko. Oraingoan ikasleak izango dira protagonista, eta, parte hartu ahal izateko, gehienez ere 60 segundoko bideoa bidali beharko diete antolatzaileei (ptgaraia@ptgaraia.eus) helbidera.
