Euskal kulturaren ondare diren pilota eta bertsoa uztartzen dituen ekimena lehen aldiz egingo dute Arrasaten, urriaren 26an. 18:00etan hasiko dute eta sarrera doakoa izango da. Mikel San Miguel Kirol zinegotziak eman ditu ekimenaren inguruko xehetasunak. "Bi bertsolarik, bikote bakoitzaren botilero lanak egingo dituzte. Partidan zehar hainbat atsedenaldi egingo dituzte pilotariek, eta, botileroek, bertsoz aholkuak emango dizkiete. Askotan, umoretik izaten dira eta ikusleak asko gozatzen du. Bertsolariek, saioaren hasieran eta amaieran agur bana botako dute".
Ane Zuazubiskar bertsolari arrasatearra arituko da bertsotan, Amets Arzallusekin batera. Zuazubiskarren arabera, "polita" izango da entzule zein ikusle moduan egondako frontoian kantatzea. "Pilota partidak ikustera etorri naizenean edo txapelketako saioetan beti pentsatu izan dut plaza ona izan behar dela Uarkape. Bertso-pilota saioetan lehen aldia da niretzat eta, egia esan, Uarkapen izateak ilusioa sortzen dit. Ea asmatzen dudan egunean bertan, ze pilotazalea banaiz, baina hori bertsotan esatea ez dakit erraz-erraza izango den".
Lau pilotari ariko dira lehian
Pilota partiduari dagokionez, bikoteka arituko dira. Alde batetik, Ander Etxaniz (Bergara, 2001) eta Jon Erasun (Zizurkil, 1996) ariko dira. Beste bikotea, berriz, Mikel Goñik (Oronoz-Mugairi, 1977) eta Manex Balerdik (Antzuola, 1999) osatuko dute.
Balerdik hala definitu ditu pilotariak: "Mikel eta Jon hainbat urtez aritu izan dira profesionaletan eta aurkezpen handiegirik ere ez dute behar. Anderren eta nire kasuan, bailarako bi pilotari gara, eta gaur egun Soraluzeko klubean dihardugu biok. Normalean, bikotea osatu ohi dugu eta, kasu honetan, aurkari izango gara". Inoiz bizi izan gabeko esperientzia dela eta, "gogotsu" dagoela ere aitortu du antzuolarrak. "Ekimen polita da, bai pilota eta bai bertsoa euskal kulturaren parte garrantzitsua baitira".
