Heike Freire pedagogoaren Berdean hezi liburua euskaratu izana abiapuntu hartuta, badira bederatzi urte Naturan Jolasean ekimena egiten dela Arrasaten, naturak heziketan duen garrantzia azpimarratzera datorrena. Aurtengoa joan den asteburuan abiatu zuten, Meatzerrekako Montxongo kobako bisita gidatuan 50 bat ume eta nerabe elkartuta, eta bigarren ekintza atzo egin zuten. Atzo arratsaldean naturako elementuez baliatuz murala sortu zuten Biteri plazan eta ondoren Monterron parkera joan ziren kalejiran; Monterronen Sua argitaletxeko Argiñe Areitiok Adi Natura bildumako liburu berriak aurkeztu zituen. Helburua, betiere, umetatik naturarekin harremana izatearen garrantzia azpimarratzea.
Elkarlana, ekimenaren oinarri
Elkarlana da Naturan Jolasean ekimenaren oinarri nagusietako bat; aurten ere hainbat eragile aritu dira antolakuntzan: Txatxilipurdi, Ereindajan, Besaide, Leintz Eskola Kirola, Haur eta Guraso Asanblada, Udalako Ingurumen Eskola, Arrasateko Udala, Musakolako Jai Batzordea eta Guraso.eus.
Bibaka Ziorlako balkoian
Bederatzigarren edizio hau borobiltzeko bihar, zapatua, arratsaldeko seietan elkartuko dira Zaldibar frontoian handik Ziorlako balkoira igotzeko eta han mendiko praktika onen gaineko argibideak jasoko dituzte Amaia Etxebeste mendi gidari arrasatearraren eskutik. Gero batera afalduko dute eta eguraldiak laguntzen badu izarrei begira egingo dute lo, bibaka egiteko asmoa dute-eta. Bibakak aurrera egiten badu asmoa da domekan denek batera gosaltzea; 40 bat lagunek eman dute izena dagoeneko baina interesa duena jar dadila harremanetan Txatxilipurdirekin.
