Kanpanzarko harrobian grabatu dituzte sekuentzia batzuk, Erorien Haraneko nabea nola eraiki zuten birsortzeko. Horretarako, gainera, 30 bat debagoiendar aritu dira figurante moduan. Perezek nabarmendu du "zoragarria" izan dela grabaketa. "Hainbat boluntariok hartu dute parte, garai hartako jantzi eta tresnekin, eta benetan ikusgarria izan da. Gainera, grabazio guztia zuri-beltzera pasatu dugu eta oso sinesgarri geratu da. Pentsa, historialari batek galdetu digu ea nondik atera ditugun nodoko irudi horiek".
Produktoreak aitortu du hunkitu egin dela grabaketan herritarren partetik sumatu duen konpromisoarekin. "Sekulako elkartasuna antzeman dut, kontzientziazio maila oso altua, boluntario guztien partetik, eta horrek asko hunkitu nau, bene-benetan".
Ikus-entzunezkoak Cuelgamuroseko Haranean –2022ra arte Erorien Harana izan zen horretan– gertatuak kontatzen ditu, Monasterioko eskolanian bizi izan zen mutiko baten begietatik. Hain zuzen, Pepe Galan bera da mutiko hori. "Franco palioaren azpian joaten zenean, haren aurrean joaten ziren umeetako bat nintzen ni. Orain, hirurogeitaka urteren ostean, memoria arloko dokumentalgile moduan egin dudan ibilbidea itxi gura izan dut lan honekin".
Cuelgamuros haranari buruz ezohikoa den perspektiba batetik hitz egiten du dokumentalak, zuzendariaren esanetan, beharrezkoa den perspektiba batetik, alegia. "Esplikaezina da Erorien Harana existitu izana eta esplikaezina da, dokumentalaren hasieran adierazten dudan moduan, gaizki kontatu den historia hori guztia, kontatu izan denetan".
Justizia eta erreparazioa ezagutu gabe hil diren horien omenez egin du dokumentala Galanek, aitortu duenez, eta Kulturaten aurkeztutakoa aurrerapen bat baino ez da izan. Hala, datorren urtean argitaratzea gustatuko litzaiokeela nabarmendu du.
