Arrasateko hainbat eragilek dihardute lanean Arrasateko Txosna Batzordean: Arrasateko Ernai, GKS, Askapena, Euskal Herrian Euskaraz, Ttak gazte taldea, Ikasle Abertzaleak eta Arrasateko Bilgune Feminista.
Azken hori arduratuko da txupinazoa botatzeaz, San Juan bezperan, 12:30ean eta ondoren trikipoteoa egingo dute, herri bazkarirako motorrak berotzeko (txartelak agortuta daude). Arratsaldean, makalaren igoeraren ostean, Kontralde, Larru Beltzak eta Youth United igoko dira txosnetako oholtza gainera. Tartean, Ez izen konplize ekintza feminista egingo dute.
San Juan eguneko eskaintzaren baitan, magia erakustaldia eta Assata taldearen kontzertua daude eta ekainaren 25ean, berriz, J Martina, La Furia eta Huntza taldeen emanaldiak izango dira, besteak beste, Zeuk ein zeuk jan bazkariarekin batera. Halaber, presoen aldeko manifestazioa ere egingo dute, Sarek antolatuta, 19:30ean txosnagunetik abiatuta.
Azkenik, batzordetik gogorarazi dute txosnagunea gune aske bat izango dela eta ez dutela inolako erasorik onartuko.
