Espainiako Garraio ministroak kalteak ukatu izana deitoratu du Ruiz de Pinedok. "Jakin badakigu kalteek ez dutela atzera bueltarik baina, suntsiketa gehiago saihesteko, gertatutakoari buruz azalpenak emateko eta erantzukizunak argitzeko ordua da, eta ez kalteak ukatzeko. Ez da egia ministroak esandakoa. Gobernuak, neurririk ez hartzeaz gain, gertatutakoa ezkutatu du".
Adifeko eta Gipuzkoako Foru Aldundiko teknikariek egindako txosten tekniko bat aipatu du Ministroak bere hitzak argudiatzeko, EH Bilduren esanetan, "inork ezagutzen ez duen txostena". Hori dela eta, idatzi hori helarazteko eskatu dio Euskal Herria Bildu Talde Parlamentarioak Espainiako Gobernuari. "Ez dugu ziurtasunik AHTak eragindako zuloaren eta aztarnategiaren artean zenbat metro dauden. Ministroaren arabera 300 metro inguru daude eta Eusko Jaurlaritzaren hitzetan, berriz, 140 metro. Ilunkeria eta informazio falta eta ikerketa faltaren aurrean, ingurunea errespetatuko duen tren sozial baten aldeko apustua berresten dugu alternatiba gisa", nabarmendu du Ruiz de Pinedok.
Raquel Sanchez Garraio Ministroak azpimarratu du, halaber, AHTan inbertitzen jarraituko duela, "ondare nazional eta arkeologikoa babesteko beharrezkoak diren neurriak hartuz".