Arrasateko Lorezainek, euren lan baldintzak hobetzearen aldeko borroka hasi zuten uztailaren 18an: "Ordutik hainbat agerraldi, elkarretaratze eta aldarrikapen publiko egin ditugu gure eskaerak jakinarazteko. Azken asteetan herrian agertu diren eraso eta apurketak, ordea, ez ditugu gure egiten, eta ekintza horietatik bereizten gara".
Argi utzi nahi izan dute lan gatazka honen konponbidea "negoziazio baten bidez" etorriko dela. Horregatik egoera hau lehenbailehen konpontzeko exijitu diete, beste behin, bai Prezero enpresari eta baita Arrasateko Udalari, "gure lan eskubideak errespetatu eta lan baldintza duinak bermatuz, eta lan gatazkari benetako irtenbidea emanez".
