"Panel bat sortu dugu, herritarrek haien lorpenak eta Euskaraldiari esker eman dituen aurrerapausoak idatzi ahal izateko, horri balioa emateko eta ikusarazteko benetan zer lortu genezakeen ariketa sozial honekin", azaldu du Ikuska Lizarraldek, Euskaraldiaren Arrasateko dinamizatzaileak.
Hala, Maiatzaren Bata plazan abiatu dute kalejira eta, trikiti eta txalaparta doinuek girotuta, hainbat komertzio zeharkatu dituzte, Herriko Plazara heldu arte. Modu horretan, merkatariak haien bizipenak idazten joan dira, eta panelean itsasten. Era berean, herritarrek ere hartu dute horretarako tartea, eta batzuk ausartu dira mikrofonoa hartu eta haien esperientziak adierazten. "Pozik gaude kalejirak izan duen erantzunarekin, uste baino jende gehiago batu garelako, eta oso giro polita sortu delako", nabarmendu du Lizarraldek.
Bastida akademia eta Olgeta jostailu denda dira Euskaraldiari atxikimendua adierazi diotenetako bi, eta haien lorpenak plazaratu dituzte panelean. Bastida akademiako Xabier Arnaizek, esaterako, azaldu du haien barne bileretan euskara gehiago erabiltzen dutela Euskaraldiari esker, eta irakasleei bidaltzen dieten dokumentazio guztia euskaraz zein gaztelaniaz idazten dutela. Olgeta jostailu dendako Itsaso Pagoagak, era berean, dio bezeroekin izaten dituzten elkarrizketa elebidunetan haiek euskaraz jarraitzea. "Batzuetan kosta egiten zaigu, errazago jotzen dugu gaztelaniara, eta Euskaraldiak hori aldatzen lagundu digu, horretan indartu garela uste dut".
Panela kalean geratuko da
Datozen egun eta asteetan kalean egongo da panela, San Frantzisko elizako paretan. "Herritarrek aukera izango dute haien lorpenak panelean idazteko, beraz, geroz eta gehiago bete, orduan eta hobe izango da, jendeak ikus dezan, identifikatuta sentitu dadin eta Euskaraldian parte har dezan", azaldu du dinamizatzaileak.
Santa Marinan eta Musakolan ere bai
Aurtengo beste helburuetako bat da erdigunetik auzoetara hedatzea. Hori dela eta, oraingoan San Andresen egin duten moduan, Santa Marina auzoan eta Musakolan egitea ere aurreikusten dute. "Zehaztapen guztien berri emango dugu sare sozialetan eta hedabideetan, beraz, adi egon!".
