Ekiola kooperatibaren bitartez, herritarrak eguzki-parke txikien bidez hornituko dira eta kooperatiban parte hartuko dute energia sortzeko eta kudeatzeko.
Arrasateko, Aretxabaletako, Eskoriatzako eta Leintz Gatzagako udalez gain, Fagor Taldearen, Mondragon Taldearen, Debagoiena 2030 sarearen eta Energiaren Euskal Erakundearen babesa du Leintz Bailarako Ekiola Kooperatibak, besteak beste. Hainbat ordezkarik proiektuaren inguruko xehetasunak emango dituzte, herritarren zalantzak argitzeaz gain.
Saioa bukatzearekin batera, kooperatiban izena emateko aukera irekiko dute han bertan, izena ematen dutenek lehentasuna izan dezaten irail inguruan zabalduko duten bazkidetza kanpainan. Halaber, ohartarazi dute orain izena emateak ez dakarrela inongo konpromisorik; hau da, ez duela ezertara lotzen.
Online jarraitzeko aukera
Hitzaldira bertaratzeko aukerarik ez dutenek saioa zuzenean jarraitzeko aukera izango dute Goiena.eus-en. Gainera, txataren bidez galderak egiteko aukera ere egongo da.