Txaetako berdegunean aparkalekuak egitearen aurka azaldu dira hainbat bizilagun

Eneko Azurmendi 2021ko eka. 23a, 16:00

Ohar batean, Arrasateko Udal Gobernuari eskatu diote ez dezala kendu kale horretan daukaten berdegune bakarra aparkalekuak egiteko. "Nahi duguna da gure auzoa onbideratzea eta kirola eta osasuna sustatzea, bai eta berdeguneak ere, eta ez gure etxebizitzetatik ateratzen garen bakoitzean, gure seme-alabak harrapatzeko edo aparkalekuko kea eta gas kutsagarriak arnasteko arriskua ote dugun kezkatu behar izatea", azaldu dute. Sinadurak biltzen ere hasi dira.

Hiru arrazoi nagusi eman dituzte aparkalekuen proiektuari desadostasuna adierazteko:

Foku kutsatzaile bat da, bai akustikoa, bai airearena, eta hori oso kaltegarria da gure etxebizitzetatik gertu dagoelako. Eta ez behean sinatzen dutenei bakarrik, baita eragingo die ospitale barruan dauden pazienteei, kontuan hartuta aparkalekuak txandakakoak izango direla eta, beraz, ibilgailuen joan-etorria etengabea izango dela.
Axola zaigu eta kezkatzen gaitu gure seme-alaben segurtasunak, aparkalekuak jarri nahi dituzten gunearen ondoan dagoen haur-parkea hurbil baitago, eta gure adingabeak harrapatzeko edo aparkalekuarekin zerikusia duen beste edozein gorabehera edo istripu izateko arriskuan baitaude.
Kontuan hartuta berdeguneek ongizatea ematen digutela, bai fisikoa bai emozionala, eta gogoeta egiteko, aske sentitzeko, lasaitzeko eta estresa murrizteko aukera ere ematen digutela, Txaetako eremurako galera garrantzitsua izango litzateke.

Hori dela eta, beste aukera batzuk azter ditzala eskatzen diote Udal Gobernuari. "Kontuan hartu daitezkeen hainbat proiektu daude. Batetik, landare-birika bat landatzeko partzela egokia da. Bestetik, muskulu-ariketak egiteko gailuak jarri daitekze gure adinekoentzat, eta tenis-mahai batzuk eta abar. Bestade, esertzeko eserlekuak, bai Txaetako bizilagunentzat, bai larrialdietatik kanpo zain egon behar duten pertsonentzat. Azkenik, saskiak edota ateak dituen kirol-gune bat, haurren eta gazteen kirola eta osasuna sustatzeko".

"Aparkalekuak ez dira irtenbidea"

Autobus geltoki berria ospitaletik gertu egongo denez, uste dute aparkalekua ez dela irtenbidea. "Ospitaleko langileentzako alternatiba gisa, hauek ez bakarrik ibilgailu partikularretan, baita autobusetan ere lanera gerturatzeko aukera izango dute, kutsadura gutxiago sortuz eta larrialdietara datozen pertsonentzat aparkaleku libre gehiago utziz". Bizilagunen ustez, beste aukera bat izango litzateke zaborraren edukiontziak zeuden lekua aparkaleku gisa egokitzea (Kaonbiko lokalaren ondoko gunea).

Azkenik, "laster" etxebizitza-bloke berriak eraikiko dituztela eta, parkea txiki geratuko zaiela uste dute. "Eta horri aparkaleku hori eraikitzea gehitzen badiogu, arazo handia izango da goian aipatutako alderdi guztietan".

Horregatik, eta egoerak duen "garrantziagatik", eskerrak eman dizkiote Gobernuari arreta emateagatik. "Eta espero dugu aurretik adierazitakoaren aldeko irtenbide bat ematea".