Gaur, astelehena, Arrasateko Ferrerias eta Erdikokale kaleetan ohikoa baino mugimendu handiagoa egongo da, gaur hasiko baitira Erase una vez... Euskadi pelikularen grabaketa lanak. Aktore, produktore eta bestelako parte-hartzaileen artean 100 lagun inguru arituko dira filmatze lanetan.
Ferrerias kalean –konkretuki, Jovi margo denda ohia zegoen lokalean– King's ileapaindegia irudikatzeko grabaketak egingo dituzte, eta jada dena gertu dute. Duela astebete hasi ziren dekoratuak 1980ko hamarkadara egokitzen, –paretetako papera, aulki eta ile-lehorgailu zaharrak, garaiko afixak...– eta kanpo aldeko erakusleihoa ere gertu dute.
Erdikokalen, aldiz, elektratresna denda bat irudikatuko dute –Aitor elektratresnak–; konkretuki, Modas Mercheren lokal ohian –San Juan Bataiatzailea eta Zur-Lur denden artean–. Bertako dekoratuak ere oso aurreratuta dituzte, erakusleihotik errez ikusten baitira 80. hamarkadako telebistak, irratiak, eta musika-erreproduzitzaileak.
Esan bezala, 12 urteko lau gazteren pasarteei buruzko filma da, atze-aldeko oihalean 80. hamarkadako Euskal Herriko bizimodua izango duena. "Euskal Herri zahar, borrokatzaile eta aztoratu bat irudikatuko du; labirinto moduko bat, non gomazko pilotek eta askatasun ametsek graffitiz betetako pareten kontra jotzen duten" azaldu dute pelikularen ekoizleek.
Manu Gomez
Madrilen bizi den Manu Gomez arrasatearra da filmaren zuzendaria, eta rol horretan egingo duen debut lana izango da. Aurrez, besteak beste, zuzendari gisa aritu da laburmetraiak grabatzen –2012. urteko Das Kind, esaterako– eta gidoilari eta zuzendari-laguntzaile bezala ere aritu da hainbat telesailetan eta pelikulatan: El gran marciano, Al alcance de su mano, En la ciudad sin límites, Los Borgia, El capitán Trueno y el Santo Grial, Yoyes, Todas hieren, The world is not enough, La que se avecina, Aquí no hay quien viva edo La Fuga, besteak beste.
"Nire haurtzarora eta hezten ikusi ninduten kaleetara hurbilduko nauen pelikula da hau. Honen helburu nagusia, lau haurren begiradatik 1980ko hamarkadako Euskadi erakustea izango da; arrasto sakona utzi baitzuen garai horiek bizi, gozatu eta deitoratu genituen artean " azaldu du Gomezek.
La Canica ekoiztetxeak ekoiztu du pelikula. 2010ean sortu zen, eta ordutik zinegile gazte eta hasiberrien aldeko apustua egin izan du.