Komertzio txikien egokitzapenak diruz laguntzea proposatu du Ahal Dugu Arrasatek

Bi herritar, Arrasateko komertzio bateko erakusleihoari begira.

Merkatariendako maskarak, eskularruak, manpara edo bereizketa kristalak, gel hidro-alkoholiko boteak, aurpegia babesteko maskarak, desinfektatzaileak eta laser termometroak Udalak lortu eta finantzatzea da alderdi moreak mahaigaineratu duena.

"Komertzio txiki hauek bi hilabetez itxita egon dira, diru-sarrerarik gabe, horrek dakarren esfortzu ekonomikoarekin, eta epe motzean berriz zabaltzea ahal eta nahi dutenek inbertsioak burutu beharko dituzte euren establezimenduak egokitzeko", diote. Hori dela eta, Udalak egokitzapen lan horiek diruz laguntzea proposatzen dute, "berriz martxan jartzea lagunduz eta osasun irizpideek zuzentzen dituzten beharrezko materialak lortzeko, prebentzio neurriak bete ahal izateko eta abar".

Eskaera, bigarrenez

 Ahal Dugu Arrasatek adierazi duenez, badira ia bi hilabete eskaera egin ziotela gobernu taldeari, merkatari txiki, ostalaritza eta alarma egoeran galerak izan dituzten autonomoei dirulaguntza lerro bat errazteko. "Gure eskaerak ez zuen erantzunik jaso, baina aipatutako sektoreek jasango duten egoera gogorra aurreikusiz, berriro bideratzen diogu udal gobernuari proposamena, datozen hilabeteetan tokiko merkataritzaren errealitate latza kontuan hartu eta bere jarrera berriz pentsatu dezan".

Oposizioko alderdiek gobernu taldearen proposamenen berri prentsaren bidez jasotzen dutela diote . "Ez daukagu beste erremediorik guk ere gure proposamenak prentsaren bidez helaraztea baino".

Komertzio txikiaren alde

"Merkataritza txikia da gure udalerriaren arima bizirik mantentzen duena eta ezinbestekotzat dugu segurtasun guztiarekin lan egin dezaten beharrezko materialak erraztea, bi hilabetez beharturik itxita egon ondoren beste esfortzu ekonomiko bat ezartzeko", bukatu dute.

Batzordean planteatzeko dio Gobernuak

Udal Gobernuak zera erantzun dio Ahal Dugu Arrasateri: "Alderdi politiko guztiei jakinarazi diegu, beti, planteatu nahi dituzten gaiak dagokion batzordean planteatu ditzatela eta bertan tratatuko direla".

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.