.jpeg)
Hilabete honetan egindakoaren balantzea egiterakoan, Udaltzaingoak adierazi du lehenengo momentutik zerbitzua egoerara egokitu dutela. Hala, "egunerokoak eskatzen dituen jarduerak gutxitu" egin direla diote, jendea etxean dagoelako, "baina handitu egin dira segurtasunari dagozkion kontrolak".
Alarma egoerako datuak
Alarma egoera indarrean sartu zenetik Udaltzaingoak 1.047 pertsona identifikatu ditu, eta 119 santzio proposamen egin dituzte arauak ez betetzeagatik. Era berean, 2.900 ibilgailu baino gehiago gainbegiratu dira.
Horrez gain, Osasun Zentroetan 115 egiaztapen gauzatu dituzte; erosketa guneetan –dendak, farmaziak…– 155; eta, herriko leku publikoetan 165 –Gernika zumardian, Santa Barbara Parkean, bide gorrietan, errepideetan, Erdialdeko eta auzoetako kaleetan, etab–.
Herritarrei zuzenduako arreta ere areagotu egin dute. "Bizi dugun egoera honetan garrantzi handikoa da berau. Herritarrek dituzten zalantzak argitzea, dugun legedi aldakorrak sortarazitako zalantzei erantzunez Udaltzaingoak duen informazio guztiarekin, gremio eta profesional ezberdinen beharrei erantzutea, eta bizikidetzak sortarazitako arazoetan laguntzea, bitartekaritza lanak egitea. Horretan ere Udaltzaingoa beharrezko da", zehaztu dute Udal arduradunek.
Udalak Udaltzaingoaren lana "ezinbestekotzat" jo du
Udaltzaingoaren lana “ezinbestekoa” dela adierazi dute Udal arduradunek; eta, bestetik, herritarren jokabidea "eredugarri eta egoki" gisa definitu dute. Momentu honetan Udaltzaingoaren lana 3 esparru nagusitan kokatzen da: segurtasuna; Udalaz gaindiko erakundeekin eta udaletxeko beste Sailekin egiten den lankidetza; eta, herritarren arreta.
