Hainbat herri batzar egin eta sinadura bilketa postu jarri ostean, herritarrek osatutako Arrasate Aurrera! plataformak batu ditu maiatzaren 26an parte hartu ahal izateko beharrezko zituen sinadurak. Guztira Arrasaten erroldatutako 500 lagunen sinadura behar zituzten, eta martitzen goizean aurkeztu zituzten. "500 baino zertxobait gehiago aurkeztu ditugu, badaezpada. Orain espero dugu denak balekoak izatea, eta dagokion galbahea pasatzea" azaldu dio Ramon Ugaldek GOIENAri. Hurrengo pausua zerrenda osatuko duten 21 lagunak aurkeztea izango da. Ugaldek jakinarazi du apirilaren 23ra arte dutela horretarako tartea, eta badabiltzala zeregin horretan.
2018ko urrian eman zuen aditzera Ugaldek, herritarren zerrenda bat osatzeko asmoa zuela: "ideologiarik gabekoa", eta "Arrasaterentzako proiektu garrantzitsuetan oinarritutakoa". Ostean, abenduaren 27an, egin zuten plataforma proiektuaren aurkezpena, Herriko Plazan.