Arrasateko jaiak ilustratzeko irudia aukeratzeko antolatzen du lehiaketa Udaleko Kultura Sailak, eta hamalau diseinuren artean Leire Arregirena izan da irabazlea. Herriko ikur diren dragoia eta udaletxea erabili ditu, eta sari gisa 750 euroko diru-saria jaso du. Arte Ederretan lizentziaduna da eta sorkuntza eta ilustrazioa dira haren espezialitateak. Ez da lehenengo aldia kartelak eta ilustrazioak egiten dituena, baina bai bere lanak lehiaketa batera aurkezten dituena. Horregatik, ustekabean eta poz-pozik hartu zuen irabazle atera zela esan ziotenekoa. Aire libreko pintura lehiaketetan-eta aritua da, ordea.
Dragoia, Errementari dantza eta sua
Arregirendako "ohore handia" da bere lana herriko etxeetan eta kalean euskarri ezberdinetan ikustea. "Langabezian nago eta lehiaketaren berri izan nuenean parte hartzea erabaki nuen" dio. 750 euroko saria, lanerako materiala erosteko erabiliko du. Kartelaren ezaugarriei buruz galdetuta, dio lehenengo marrazkia eskuz egin eta, ostean, ordenagailuarekin koloreztatu zuela. Eta hasieran, beste ideia bat zeukala. "Arrasateren ikono nagusi den dragoia erabili nahi nuen; hori hasieratik neukan garbi. Gero, udaletxea, errementari dantza eta San Juan suak dira marrazkian ageri diren beste elementuak". Aurten 25 urte betetzen dira Errementari dantza egiten hasi zirela eta, horren berririk ez bazuen ere, bere alde jokatu duela aitortzen du Arregik. Bi lan aurkeztu zituen lehiaketara.
San Juan sua euskaraz
Aimar Elortzarendako ere lehen aldia zen sanjuanetako esaldi lehiaketan "edo antzekoetan" parte hartzen duena. "Lehiaketa martxan jarri zela jakin nuenean, parte hartzea pentsatu nuen, eta momentuan buruari apur bat emanda, hiru esaldi edo lelo bururatu zitzaizkidan" dio. Horietako bat izan da, azkenean, irabazlea. 100 euroko saria jaso du Jaiak suaz, euskara zuaz esaldiarengatik. "Harro eta gustura" dagoela dio, bere esaldi bat "herriko jaietako zapietan ikusteagatik". AED elkartea, Debagoieneko AEK, Arrasateko EHE eta Arrasateko Udala dira antolatzaileak. 70 proposamen aurkeztu dira aurten, "inoiz baino gehiago" antolatzaileen esanetan, eta parte hartzaileak 30etik gora izan dira.
Arrasateko Udalak 8.000 esku-programa banatu ditu etxerik etxe eta beste 500 kartel, kalean eta establezimendu publikoetan. Horretaz gain, beste 500 zapi, more kolorekoak, esaldi irabazlearekin, tabernetan salgai jarriko dituzte 3 eurotan, eta beste 500 pegatina, jaietako karteleko marrazkiarekin eta lehiaketako esaldi irabazlearekin.
Bai Arregik eta baita Elortzak ere, diote jaiak Arrasaten pasatuko dituztela: txosnetan, kalean "erraldoi eta kiliki artean dantzan"…, zapi eta guzti, zela ez!
ALBISTEAK ESKUKO TELEFONOAN
Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!
WHATSAPP: Bidali ALTA 688 69 00 07 telefono zenbakira –Whatsapp bidez–.
TELEGRAM: Batu zaitez @GoienaAlbisteak kanalera.
ASTEBURUETAKO BULETINA
Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.
Harpidetza aukera guztiak
