Arrasateko EH Bilduko zinegotziek Zuhaitz Egunean parte hartzera deitu dute

EH Bilduko zinegotziek bat egin dute Udalak biharko, hilak 16, prestatu duen Zuhaitz Egunarekin: "Dei berezia egiten dizuegu herrikide zaituztegun guztioi zuek ere hurbil zaitezten, Kurtzetxikin egingo den zuhaitz landatzera, bereziki", adierazi dute ohar bidez. 

Zuhaitz landaketari garrantzia eman diote koalizio ezkertiar eta abertzaleko zinegotziek: "Gure zuhaitzak, gure basoak, gure Ama Lurra gu guztion ondare dira eta guztion ardura da, beraz, haien alde lan egitea". 

Aurreko agintaldian Kurtzetxiki mendi eremua berreskuratzeko ekimenarekin jarraitzea gura du EH Bilduk: "Udalaren eta herritarren arteko auzolanari esker, urrats garrantzitsuak eman ditugu mendi eremu hori berreskuratzeko eta bihar segida emango diogu ekimenari, 40 gaztainondo eta intxaurrondo landatuz". 

Zuhaitz Feria eta pago gorriaren landaketa

Goizean zehar egingo diren beste ekintzetan parte hartzera ere gonbidatzen dituzte herritarrak. Alde batetik, Seber Altube plazan, hileroko baserriko produktuen azokarekin batera egingo den Zuhaitz Ferian eta, beste alde batetik, 13:00etan Arrasate pasealekuan pago gorri bat landatzeko ospatuko den ekitaldian: "Gure zuhaitzei, gure basoei, Ama Lurrari zor diegun guztia aitortu eta eskertzeko modua izango da", gaineratu dute.  

Erlazionatuak

Zuhaitz Feriarekin batera dator zapatuan Arrasateko Baserritarren Azoka

Arrasate

Zapatuko Zuhaitz Egunaren barruan, Udalak Zuhaitz Feria antolatu du hileko hirugarren zapatuan egiten den baserritarren azokarekin batera. Ohi modu...

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.