Amiantoaren ondorioz gaixotu den langileari babesa adierazi dio Ifamek, CCOO "gezurretan" aritu dela esateaz batera

Ifam enpresak babesa erakutsi dio amiantoaren ondorioz gaixotu zen J.Z.E. langileari: "Asko sentitzen dugu gertatutakoa, baina amiantoa erabili zenean inork ez zekien txarra zenik". Horrez gain, CCOO sindikatuak oharrean gezurrak esan dituztela diote: "Gezurra da sindikatuak bazekiela hemen amiantoarekin lan egiten genuela; jakingo balu, arduragabekeria litzateke euren partetik lehenago salatu ez izana. Era berean, Osalanek hala eskatuta, amiantoaren inguruan lan egin zuten langile guztien zerrenda pasa dugu, hau da, ez da CCOOren eskaera bat izan. Ezbehar batetik etekina atera nahian dabiltzala dirudi, enpresari kalte handia egiteaz gain". 2000. urtetik, amiantoa osasunarendako kaltegarria dela jakin zenetik, ez dago produktu hori enpresan eta gaixotu den langileak 1991a ezkero ez zuen amiantoarekin lan egiten, enpresako ordezkarien arabera. 

Ifam enpresako arduradunen arabera, gaixotu den langilea 1972tik 1991ra "noizbehinka" ibili zen lanean amiantoaren inguruan, baina 1991tik aurtengo otsailera –gaixotasunagatik baja hartu zuenera arte– ez zuen produktu kaltegarri horren ondoan lan egin. 

"Harridura" Osalanen

Bestalde, Ifameko ordezkarien arabera, Osalan "asko" harritu zen euren enpresan kasu hori eman izanagatik: "Adibidez automobilgintzan diharduten enpresetan ohikoagoak dira halako kasuak eta ezingo dugu jakin zein den benetan arazoaren jatorria". 

Analisiak gainerakoei

Gainera, Ifameko ordezkariek jakinarazi dute amiantoak eragindako gaixotasunek ez dutela protokolo prebentiborik: "Amiantoaren inguruan lan egin zuten langile guztiei aldizkako analisiak egingo zaizkie gaixotasuna garatu duten jakiteko, sintomak oso epe luzera agertu daitezkeelako, batzuetan baita 40 urtera ere. Eta beste kasuren bat agertuz gero aurpegia emango dugu". 

 

Erlazionatuak

Ezintasun absolutua aitortu diote Arrasateko enpresa baten amiantoarekin lan egin zuen behargin bati

Arrasate

Gizarte Segurantzaren Gipuzkoako Zuzendaritzak laneko ezintasun absolutua aitortu dio Arrasateko Ifam Seguridad SLU (lehen Feliciano Aranzabal y Ci...

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.