1940ko hamarkadako Arrasate ikusgai

Jokin Bereziartua Lizarazu 2015ko eka. 8a, 16:28

Arrasate Zientzia Elkarteak –Udalaren laguntzaz– balio handiko beste erakusketa interesgarri baten berri eman du gaur. Oraingoan 1945. urtearen bueltako Arrasate erakutsiko dute, bertako denda, fabrika, negozio eta herriko pertsonaia ezagunak arrasatear guztien eskura utziz. Ekainaren 12an, egubakoitza, egingo dute erakusketaren inaugurazioa Kulturateko klaustroan, eta uztailaren 11ra arte egongo da zabalik. Alberto Loiti arrasatearraren lanetik abiatu da erakusketa. 

Arrasate 1945 deritzon erakusketaren abiapuntua Alberto Loiti arrasatearraren lan handian dago. Harena da hasierako ideia, Guipuzcoa en la mano. Anuario General de toda la provincia 1945 liburutik datorrena: "Liburu horren bidez Albertok atera ditu orduko planoak, publizitatea, argazkiak eta beste hainbat kontu. Bi urteko eguneroko lana da erakusketa honen atzetik", dio Arrasate Zientzia Elkarteko kide Xabier Bengoak.

200 pieza eta 200 erretretatu

Bi urte luzeko lanaren ostean eta 1945eko Arrasateko plano bat oinarri hartuta, Mondragoen zeuden denda, fabrika eta negozioak erakutsiko dituzte kalez kale eta, besteak beste, orduko pertsonaiak eta askotariko tresnak bertatik bertara ikusteko aukera ere egongo da. Antolatzaileek aurreratu dutenez, besteak beste, 200 bat erretratu eta beste 200 bat pieza jasoko ditu erakusketak.  

Orduko Arrasate hurbiltzea

Helburua da hainbat belaunaldirendako ezezaguna den Arrasateko historia hurbila erakustea. 1940Ko hamarkada mingarri eta zailaren testuingurua arrasatearrei hurbilduko diete antolatzaileek, betiere Arrasateko Udalaren laguntzaz. Arrasate Zientzia Elkartekoendako dena du berezia erakusketak eta horregatik dei egin diete herritarrei Kulturateko klaustrotik pasatu daitezen.

Izan ere, ilusio guztiarekin ekin diote lanari eta orain arte eten ez den kateak aurrerantzean ere etenik izango ez duela espero dute.  

 

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak