Arrasateko alkate Inazio Azkarragaurizarrek azaldu duenez, elkar ezagutza indartzea eta kanpotarrekin sortzen diren estereotipo negatiboak datuen bidez deseraikitzea da gaur aurkeztu duten egitasmoaren helburu nagusia. Arrasateko jatorri aniztasuna zenbakitan du izena egitasmoak eta Aztiker enpresak egin du lan hori. Aplikazioa dagoeneko erabilgarri dago Arrasateko Udalaren webgunean, modu erraz eta deskriptiboan. Lan hori egiteko erroldako datuak modu anonimo baten jaso dituzte Aztiker-ekoek.
Askotariko datuak
Jatorri aniztasunaren mapa horretan askotariko datuak kontsulta daitezke. Arrasatearren jaiolekua kontinenteen eta estatuen arabera ikus daiteke eta baita, esaterako, zenbat arrasatear jaio diren Euskal Herriko udalerrietan zein Euskal Herritik kanpoko udalerrietan.
Etekina ateratzea, denon ardura
Hori bai, aplikazio berria erabiltzea denon ardura dela uste du ongizate zinegotzi Amaia Larrañagak: "Orain, guztioi dagokigu tresna horri etekina ateratzea eta atzerritarrei lotutako estereotipoak deseraikitzen laguntzea. Ziur nago hemen gauden guztiok xede horren bila bidelagun izango garela".
Gaurko aurkezpenean parte hartu dute Arrasateko Udalak, Gipuzkoako Diputazioko Migrazio eta Aniztasun arloak, Aztiker enpresak, emakume musulmanen integraziorako Euskadiko elkarteak eta Elkarhezitzen-ek.
