Inazio Azkarragaurizar: "Pasealekuan bide bat irekita, obrak garestitu eta luzatuko lirateke, eta arriskua sortu"

Jokin Bereziartua Lizarazu 2015ko mar. 18a, 17:49
Inazio Azkarragaurizar udaletxe atarian, artxiboko argazki baten.

Udal gobernuak, Inazio Azkarragaurizar alkatea buru duela, Arrasate pasealekuko obrak direla-eta EAJk atzoko prentsaurrekoan esandakoei erantzuteko prentsa oharra kaleratu du. EAJk bide edo errei bat irekitzeko egindako eskaerari horrela erantzun diote: "Jakin badakite zergatik erabaki zen pasealekua guztiz ixtea, baina berriz azalduko dugu: obrek iraun bitartean pasealekuan errei bat zabalduko balitz, obren iraupena luzatuko litzateke eta obren kostuak nabarmen egingo luke gora. Gainera, segurtasun aldetik arriskutsua izango litzateke". 

Udal Gobernuaren arabera, 2014ko irailaren 16ko osoko bilkuran Udalean dauden alderdi guztiek proiektu horren alde egin zuten "mugikortasun eredu jasangarriago bat" sustatzea "lehentasunezko helburu" jarrita: "Guztiek bat egin zuten eta Arrasate pasealekutik hastea erabaki zen, gainera. Baina, antza denez, hauteskundeen atarian, EAJrentzat askoz ere interesgarriagoa da Arrasate pasealekua itxi behar izatearen inguruan eskandalua sortzea proiektuaren irakurketa serio bat egitea baino". 

Udal Gobernua, "herritarrekin biltzen"

Bestalde, EAJko alkategai Maria Ubarretxenak bide alternatiboek segurtasuna bermatzen ez dutela esan izana horrela baloratu du Udal Gobernuak: "Azterketarik egin al du EAJk hau ziurtatzeko? Mariak esan zuenez, Uribe eta Loramendi kaleetako alternatibak ez ditu segurtasun minimoak betetzen; karril bat zabaldu eta autoak eskabadora edo hondeagailu artean ibiltzeak betetzen al ditu?". Honakoa ere gaineratu dute: "Mariak atzo eskatu zigun herritarrei entzuteko. Jakin Arrasate pasealekuaren gaiaz lotuta kexa agertu duten herritarrekin ari dela biltzen Udal gobernua, azalpenak bertatik bertara emateko. Pentsatzen dugu hau jakinda jeltzaleak lasaiago geratuko direla".

"Arrasatearrak ez dira inozoak"  

Horrez gain, "hauteskundeei begira" egindako agerraldia izan zela dio Udal Gobernuak: "Aholku bat: ez zaitezte burugogor jarri Arrasate pasealekua ixtearen gaia hauteskundeetarako erabiltzen. Arrasatearrak ez dira inozoak". 

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak